Ýkraınada qazaqstandyqtardy aldaǵan 3 call-ortalyqtyń jumysy toqtatyldy
ASTANA. KAZINFORM – Qazaqstannyń Іshki ister mınıstrligi ınternet-alaıaqtyqpen kúres aıasynda sheteldik quqyq qorǵaý organdarymen birlesken jumysty kúsheıtip jatyr. Bul týraly QR ІІM Kıberqylmysqa qarsy is-qımyl departamentiniń bastyǵy Jandos Súıinbaı málimdedi.
Onyń aıtýynsha, qazir alaıaqtardy anyqtaý úshin sheteldik áriptestermen turaqty baılanys ornatylyp, aqparat almasý tetigi jolǵa qoıylǵan. Sonyń nátıjesinde birlesken arnaıy operatsııalar ótkizilip jatyr.
– Bıyl 31 naýryzda Ýkraına polıtsııasymen birlesip aýqymdy arnaıy operatsııa ótkizildi. Operatsııa barysynda Dnepr qalasynda ornalasqan, qazaqstandyqtardy aldaýmen aınalysqan 3 call-ortalyqtyń qyzmeti toqtatyldy, - dedi Jandos Súıinbaı.
Departament basshysynyń málimetinshe, arnaıy operatsııa kezinde 53 shetel azamaty ustalyp, onyń 8-i qamaýǵa alynǵan. Tergeý barysynda 160-tan astam qazaqstandyq jábirlenýshi anyqtaldy. Olarǵa keltirilgen shyǵyn Ýkraına sotynyń sheshimimen óteledi.
Jandos Súıinbaı aldaǵy ýaqytta da birqatar memleketpen ınternet-alaıaqtyqqa qarsy osyndaı birlesken operatsııalar jalǵasatynyn aıtty.
Sonymen qatar halyqaralyq yntymaqtastyqty keńeıtý úshin kompıýterlik qylmystar týraly Býdapesht konventsııasyn jáne Kıberqylmysqa qarsy is-qımyl jónindegi BUU konventsııasyn ratıfıkatsııalaý jumystary júrgizilip jatyr.
– Bul qujattar kıberqylmysqa qatysty aqparatty sheteldik quqyq qorǵaý organdarynan jedel alýǵa múmkindik beredi, - dedi ol.
Aıta keteıik, bıyl Almatyda 4 myńnan astam sheteldik jaýapqa tartylǵany habarlanǵan edi.
