Ýkraınada qazaqstandyqtardy arnaıy qyzmetter atynan aldaǵan call-ortalyq joıyldy
ASTANA. KAZINFORM — Qazaqstan Respýblıkasy ІІM kıberqylmysqa qarsy is-qımyl departamentiniń qyzmetkerleri Ýkraınanyń Ulttyq polıtsııasymen jáne Bas prokýratýrasynyń keńsesimen, sondaı-aq Qazaqstannyń Bas prokýratýrasymen birlesip, alaıaqtardyń transulttyq qylmystyq tobynyń jolyn kesti. Bul týraly Polisia.kz. jazdy.
Chernovtsy men Odessa qalalarynda uzaq merzimdi birlesken jedel is-sharalar nátıjesinde Qazaqstan azamattaryn aldaýmen aınalysqan alaıaqtyq call-ortalyq joıyldy.
— Qylmyskerler aldyn ala qurylǵan shema boıynsha áreket etken. Olar jábirlenýshilerge Qazaqstannyń Ulttyq Banki, quqyq qorǵaý organdary men arnaıy qyzmetteri atynan qońyraý shalyp, «kúdikti operatsııalar» men «terrorıstik uıymdardy qarjylandyrý» úshin qylmystyq jaýapkershilikke tartamyz dep qorqytyp, azamattardy nesıe alýǵa, múlkin satýǵa jáne depozıttegi qarajatty droptardyń shotyna aýdarýǵa májbúrlegen. Osylaısha psıhologııalyq qysym jasaǵan. Top naqty ıerarhııadan turǵan. Árkim óz rólin atqarǵan. Onda ákimshiler, HR-menedjerler, «kloýzerler», tehnıkalyq qyzmetkerler, tipti «kúshtik blok» bolǵan. Qylmystyq jolmen alynǵan aqsha call-ortalyqtyń jumysyna, avtokólik satyp alýǵa jáne taǵy da basqa nárselerge jumsaldy. «Keńseni» ustaý úshin uıymdastyrýshylar aıyna 60 myń AQSh dollaryn jaratqan, al kúdiktilerdiń biri sońǵy alty aıda bes kólik satyp alǵan. Bir mezgilde kúdiktilerdiń turǵylyqty mekenjaılary boıynsha jáne sall-ortalyqtyń ózinde júrgizilgen tintý barysynda 30-dan astam kompıýterlik tehnıka, 79 uıaly telefon, sim-kartalar, nysandy kıim-keshek, quqyq qorǵaý jáne arnaıy organdardyń, Ulttyq banktiń qyzmetkerleriniń jalǵan kýálikteri, azamattardy aldaýǵa arnalǵan túrli jaýap nusqalary bar aldyn ala daıyndalǵan stsenarııler, sondaı-aq basqa da aıǵaqtar tárkilendi, — dedi QR ІІM kıberqylmysqa qarsy is-qımyl departamenti bastyǵynyń orynbasary Aslan Óskembaev.
Tárkilengen qurylǵylarda deepfake tehnologııasy arqyly beıne men daýysty ózgertýge arnalǵan arnaıy baǵdarlamalyq jasaqtama tabyldy. Aldyn ala málimet boıynsha qaskúnemder Qazaqstan turǵyndaryn 900 mıllıon teńgeden astam somaǵa aldaǵan. Arnaıy operatsııa nátıjesinde Ýkraınanyń toǵyz azamaty ustalyp, onyń beseýi qamaýǵa alyndy.
Qazaqstannyń Іshki ister mınıstrligi bul operatsııa eki eldiń quqyq qorǵaý organdarynyń úılesimdi is-qımyldarynyń arqasynda múmkin bolǵanyn jáne azamattardyń qaýipsizdigine qol suǵatyn transulttyq qylmystyq toptardyń qyzmetin toqtatýǵa baǵyttalǵanyn atap ótti.
Eske sala keteıik, buǵan deıin Kıevte deepfake tehnologııasyn qoldanǵan transulttyq call-ortalyq joıylǵan bolatyn.