Ýkraınada qarttar úıi órtendi: 17 adam qaza tapty

ASTANA. QazAqparat - Ýkraınanyń Kıev oblysynda qarttar úıi órtendi. 17 adam qaza tapty, dep habarlaıdy eldiń tótenshe jaǵdaılar boıynsha oblystyq basqarmasy.

Ýkraınanyń qutqarý qyzmetiniń basshysy Nıkolaı Chechetkın 16 máıit úıindiler astynan shyǵarylǵanyn, taǵy bireýin alyp shyǵý kerek ekenin aıtty. Japa shekken taǵy bes adam túrli dárejedegi kúıiktermen aýrýhanaǵa jetkizildi.

Jeksenbi kúnine qaraǵan túni Brovarskıı aýdany Letochkı aýylyndaǵy eki qabatty jeke úı otqa orandy. Órt týraly habar túngi saǵat 3:48 tústi. Úıde qart adamdar ýaqytsha turyp jatqan. Qyzyl jalyn barlyq ǵımaratqa tarady. Sýretterge qaraǵanda, ǵımarat ishi biraz zaqymdanyp, shatyrdyń keı bólikteri qulaǵan.

Aldyn ala aqparat boıynsha, úıde 35 adam bolǵan.