Ýkraınada qalyp qoıǵan qazaqstandyqtar elge qalaı qaıtarylady

NUR-SULTAN. QazAqparat – QR Mádenıet jáne sport mınıstrligi týrızm ındýstrııasy komıteti tóraǵasynyń mindetin atqarýshy Dastan Ryspekov Ýkraınada qalyp qoıǵan qazaqstandyqtardy elge qaıtarý máselesine toqtaldy, dep habarlaıdy QazAqparat.

«Eń aldymen aıtqym keletini, eger azamattar trýıst retinde týroperatorlar arqyly el aýmaǵynan shyqsa jáne týrıstik kody bolsa, olardy kez kelgen jaǵdaıda «Týrıstik qamqor» qorynyń tetikteri arqyly elge shuǵyl túrde qaıtarý sharalary júrgiziledi», - dep atap ótti D. Ryspekov Ortalyq kommýnıkatsııalar qyzmetinde ótken onlaın brıfıngte.

Sonymen birge, spıker olardyń týrıstik kody bolmaǵan jaǵdaıda ne isteý kerektigin aıtyp berdi.

«Eger atalǵan azamattardyń týrıstik kody bolmasa, bul másele dıplomatııalyq kanaldar arqyly sheshiledi. QR Syrtqy ister mınıstrligi tarapynan da tasymaldar uıymdastyrylýy múmkin», - dedi Dastan Ryspekov.

Aıta keteıik, 18 naýryzdaǵy jaǵdaı boıynsha shetelde týrıstik operatorlar arqyly demalyp jatqan qazaqstandyqtar sany 5 914 adamdy quraǵan. Olardy qaıtarý úshin 18 naýryzdan 23 naýryzǵa deıin 19 charterlik reıs josparlanǵan.

Buǵan deıin Dastan Ryspekov týrıstik joldamalar qunynyń qalaı qaıtarylatynyn aıtyp berdi.