22:28, 22 Naýryz 2022 | GMT +6
Ýkraınada qalǵan qazaqstandyqtar úshin taǵy bir reıs uıymdastyrylady
LЬVOV. QazAqparat – 25 naýryzda Katovıtse qalasynan (Polsha) gýmanıtarlyq borttyń sapary josparlanyp otyr. Ushaqpen Qazaqstan azamattarynan quralǵan topty evakýatsııalaý eskerilgen. Bul týraly Ýkraınadaǵy Qazaqstan Elshiliginen málim boldy, dep habarlaıdy QazAqparat.
«Atalǵan bortpen ushý úshin 24 naýryzǵa deıin Lvov qalasyna nemese 25 naýryzǵa deıin óz kúshterińizben Katovıtsege kelýlerińiz kerek. Katovıtsede turatyn orynmen qamtamasyz etilýi múmkin. Osy reıspen ushqysy keletinder qujat (tólqujat, balanyń týý týraly kýáligi, neke týraly kýálik) kóshirmelerin osy nómirge +380673470408 (WhatsApp) joldaýy tıis. Júk boıynsha normalar standartty áýe sapary talaptaryna sáıkes bolady. Osy bortpen shyǵatyndar úshin karantın talaptaryna qatysty jeńildikter bolady, ıaǵnı jaqynda ótken PTR-test suralmaıdy», - delingen habarlamada.
Eske salsaq, Ýkraınada qalǵan qazaqstandyqtar mingen altynshy reıs Polshadan Qazaqstanǵa ushyp kelgen bolatyn.
