Ýkraınada qalǵan 57 júk kóliginiń 51-i el aýmaǵynan shyqty

NUR-SULTAN. QazAqparat - Búgingi tańda qazaqstandyq dıplomattar 822 QR azamatyna Ýkraınadan shyǵýǵa qolǵabys kórsetti. Onyń ishinde 726 adam Polshaǵa, qalǵandary Moldova, Rýmynııa, Majarstan men Slovakııaǵa shyǵyp ketti, delingen habarlamada.

15 naýryzda Nur-Sultan qalasynyń ýaqyty boıynsha saǵat 08:50-de Katovıtse qalasynan (Polsha) 89 QR azamaty bar 5-shi evakýatsııalyq ushaq ushyp shyqty . Buǵan deıin tórt repatrıatsııalyq reıspen Qazaqstanǵa 587 QR azamaty jetkizilgeni belgili.

Qazirgi ýaqytta Katovıtse qalasynda jáne Ýkraına-Polsha shekarasyn kesip ótý kezeginde azamattarymyz joq. Harkov qalasyndaǵy evakýatsııalyq jınaý orynda 3 otandasymyz bar. Sýmy qalasynda 1 QR azamaty bar, onymen turaqty baılanys ornatylǵan.

Ýkraınadaǵy QR Elshiliginiń aqparatyna sáıkes, Marıýpol qalasyndaǵy QR azamattarynyń jalpy sany áli de 18 adamdy quraıdy. Elektr energııasy men telefon júıeleriniń úzilýine oraı olarmen baılanys ornatý múmkinshiligi joq.

QR dıplomattarynyń kómegimen 57 qazaqstandyq aýyr júk kóliginiń 51-i Ýkraına aýmaǵynan shyqty, al qalǵan 6 avtokóliktiń júrgizýshilerine jan-jaqty qajetti kómek kórsetilýde.