Ýkraınada eshkimdi qaldyrmaımyz, barlyq azamattardy alyp shyǵamyz – QR SІM

NUR-SULTAN. QazAqparat – QR Syrtqy ister mınıstrliginiń resmı ókili Aıbek Smadııarov Ýkraınadan Qazaqstan azamattaryn evakýatsııalaý qalaı júrip jatqany týraly aıtyp berdi, dep habarlaıdy QazAqparat tilshisi.

«Ýkraınada áskerı áreketter júrip jatyr. Jáne elden tek Qazaqstan azamattary ǵana emes, basqa el azamattary da ketkisi keledi. Biz qazaqstandyqtar úshin bar jaǵdaıdy jasaımyz. Kıevte 8 ǵana dıplomatymyz bar. Qazaqstandyqtardy Polsha shekarasyna jetkizýde elshilik ókilderi birge baryp jatyr. Biraq, mamandarymyz jetpeıdi, elshilikte de bireý qalý kerek. Otandastarymyzdy shekaraǵa jetkizgen soń, elshilik ókilderi qaıtyp kelip, kelesi top adamdardy jolǵa alyp shyǵady» - dedi Aıbek Smadııarov.

Onyń aıtýynsha, Ýkraına men Polsha shekarasynda qazaqstandyqtardy elshiliktiń ókilderi kútip tur.

«Olar tizim boıynsha bizdiń azamattardy tekserip, odan ári shyǵaryp salady. Shekarada 2 eldiń de keden qyzmeti shuǵyl ári tótenshe rejımde jumys istep jatyr. Bastysy olar túsinistikpen qaraıdy jáne óte sypaıy. Bizdiń dıplomattar Ýkraına qalalary men Polsha shekarasy arasynda jantalasyp júr. Sondaı-aq, jedel jeli jumys istep turǵanyn eske salaıyn. Ýkraına shekarasyndaǵy uzynsonar keptelis 20-40 shaqyrymdy quraıdy. Biz eshkimdi qaldyrmaımyz, barlyq azamattardy alyp shyǵamyz», - deıdi ol.