Ýkraınada Boeing 777 ushaǵynyń apatqa ushyraýy saldarynan «Aeroflot» 35 mln. dollardan qaǵylady

ASTANA. QazAqparat - Reseılik avıakompanııalar Ýkraına aýmaǵynan tysqary jańa baǵyttar ashýda. Bul malaızııalyq Boeing 777 ushaǵynyń apatqa ushyraýymen baılanysty. Týrıstik maýsymnyń naǵyz qyzǵan kezinde baǵyt ózgertý avıakompanııalardyń shyǵyndaryn arttyryp otyr, dep habarlady reseılik BAQ.

Máselen, «Aeroflot» shamamen 35 baǵytyn Ýkraınadan aınalyp ótýge aýystyrdy. Olardyń qatarynda eń tanymal týrıstik elder Bolgarııa, Horvatııa jáne Grekııaǵa Máskeýden shyǵatyn reıster bar. Buǵan qosa, ortasha ushý uzaqtyǵy 15-20 mınýtqa artyp otyr. «Transaero» kompanııasy da úshinshi elge oryndalatyn ushýlaryn Ýkraına aýmaǵynan tysqary baǵyttarmen júzege asyrýǵa májbúr. «ıÝTeır» kompanııasy da óz reısterin osy jyldyń maýsymynan beri soǵys júrip jatqan aýmaqtan tysqary baǵyttar arqyly oryndaýda.

Sarapshylardyń pikirinshe, týrıstik maýsymnyń naǵyz qyzǵan shaǵynda baǵyttarǵa ózgerister engizý saldarynan avıakompanııalar shyǵynǵa ushyraıdy. «VTB Kapıtal» sarapshysy Elena Sahnovanyń aıtýynsha, reseılik tasymaldaýshylardyń ishinde eń iri baǵyt jelisi bar «Aeroflot» kóp qarjysynan qaǵylady. «Óıtkeni baǵyttardy ózgertý týraly sheshim shildede qabyldanyp otyr. Al qalǵan jarty jyldyń ishinde kompanııa 35 mln. dollardan qaǵylýy múmkin», - deıdi ol.

Al «Aıvaport» agenttiginiń bas redaktory Oleg Pantellev standartty 150 oryndyq árbir ushaqtyń jarty saǵat artyq ushýy shamamen 500 dollardyń otynyn qosymsha shyǵyndaıtyndyǵyn aıtýda.

Aıta keteıik, «Amsterdam - Kýala-Lýmpýr» baǵytynda ushqan Boeing 777 beısenbi kúni keshke Donetsk oblysynda apatqa ushyrady. Ushaq bortynda bolǵan 298 adamnyń barlyǵy qaza tapty.