Ýkraınada apatqa ushyraǵan malaızııalyq laınerdiń bortynda 80 bala bolǵan
ASTANA. QazAqparat - Donetsk oblysynda apatqa ushyraǵan malaızııalyq avıakompanııanyń Boeing laıneriniń jolaýshylary arasynda 80 bala bolǵan, dep habarlady reseılik «Jańalyqtar» agenttigi avstrııalyq Osterreich gazetine silteme jasap.
«Aldyn ala málimetter boıynsha osy laınerdiń bortynda 80 bala boldy», - delingen BAQ habarlamasynda.
Budan buryn bul aqparatty ártúrli áleýmettik jelilerdiń paıdalanýshylary taratty.
Beısenbi kúni keshte Donetsk oblysynda malaızııalyq avıajelilerdiń bortynda 295 adam bolǵan Boeing 777 ushaǵy apatqa ushyraǵany belgili boldy.
Malaızııalyq laınerdiń apatqa ushyraýynyń sebepteri ázirge anyq emes. Sáýir aıynan beri avıaapat bolǵan aýdanda ýkraındyq kúsh-qýat qurylymdary aqpandaǵy memlekettik tóńkeriske rıza emes Donbass turǵyndaryna qarsy lańkestikke qarsy dep atalatyn operatsııa júrgizýde. Operatsııada avıatsııa, aýyr artıllerııa jáne zymyrandyq júıe qoldanylýda.
Sarapshylardyń aıtýynsha, ýkraın armııasynyń qolyndaǵy áskerı tehnıka Keńes Odaǵynan muraǵa qalǵan jáne soǵys qımyldarynda ony qoldaný 2001 jyly Qara teńiz aspanynda Ýkraına atyp túsirgen reseılik jolaýshylar ushaǵynyń qaıǵyly oqıǵasyn qaıtalaýy múmkin. Sol kezde ýkraın ÁQK bólimderiniń jattyǵýlary barysynda S-200 zymyran keshenimen Tel-Avıv - Novosibir baǵytyndaǵy reseılik Tý-154 ushaǵy atyp túsirilgen bolatyn. Onyń saldarynan 78 adam - 66 jolaýshy, onyń kópshiligi Izraıl azamattary jáne 12 ekıpaj múshesi qazaǵa ushyraǵan bolatyn.
Ózin-ózi jarııalaǵan Donetsk halyqtyq respýblıkasynyń jasaqtarynda 10 shaqyrymdyq bıiktikten jolaýshylar ushaǵyn atyp túsire alatyn qarýlar joq, dep málimdedi moıyndalmaǵan respýblıkanyń premeri Aleksandr Borodaı malaızııalyq Boeing 777 apatqa ushyraǵannan keıin reseılik «Jańalyqtar» agenttigine.
