Ýkraına ushaqtaryna Reseı aýmaǵynyń ústinen ushýǵa tyıym salyndy
ASTANA. QazAqparat - Reseı ýkraındyq avıakompanııalarǵa óz aýmaǵynyń ústinen tranzıttik ushýlardy júzege asyrýǵa tyıym saldy. Bul týraly 7 tamyzda RF premer-mınıstri Dmıtrıı Medvedev habarlady, dep jazady RBK.
«Úkimet sheshim qabyldady. Áńgime Reseı áýe keńistigi arqyly birqatar elderge: Ázerbaıjan, Grýzııa, Armenııa, Túrkııaǵa ushatyn ýkraındyq avıakompanııalardyń tranzıttik reısterin toqtatý jaıynda bolyp otyr», - dedi beısenbi kúni úkimet otyrysynda premer-mınıstr.
Medvedev Reseı transsibirlik ushýlar erejelerin qaıta qaraýǵa ázirlenip jatqanyn habarlady. Oǵan sáıkes batys kompanııalary Azııaǵa ushý jolyn qysqartý úshin Sibir aýmaǵynyń ústinen ushý quqyǵy úshin «Aeroflotqa» ushý roıaltıin tóleıdi. «Bizdiń el transsibirlik marshrýtty paıdalaný erejelerin qaıta qaraýǵa, ıaǵnı transsibirlik marshrýttardyń qoldanystaǵy júıesin jańǵyrtýdyń kelisilgen erejeleriniń kúshin joıýǵa ázir», - dedi RF úkimetiniń basshysy. «Mundaı jaǵdaılarda Reseı úkimeti birqatar jaýapty qadamdardy qaraıdy. Olardy atap óteıin, alaıda olar birden engizile qoımaıdy: bul Shyǵys Azııa óńirlerine, ıaǵnı Azııalyq-Tynyq muhıty aımaǵyna eýropalyq, amerıkalyq avıakompanııalardyń tranzıttik reısi úshin Reseıdiń áýe keńistigin paıdalanýǵa tyıym salý», - dep túsindirdi Medvedev.
Reseıdiń ýkraındyq avıakompanııalardyń óz aýmaǵynan tranzıttik ushýlarǵa tyıym salýy múmkin ekeni týraly 6 tamyzda qupııa tulǵalar men Kólik mınıstrligine silteme jasaı otyryp ITAR-TASS habarlaǵan bolatyn. Agenttiktiń derekkózderi Máskeý eýropalyq avıakompanııalarǵa qarsy sharalardy, onyń ishinde Sibir aýmaǵynyń ústinen ushýǵa qatysty sharalardy qatańdatýy múmkin ekendigin málimdedi. «Áńgime, mysaly, ushýǵa ýaqytsha negizde ruqsat berilgen, ıaǵnı áýe qatynasy týraly kelisimde belgilengennen tys birqatar júk jáne jolaýshylar tasymaldaıtyn avıakompanııalardyń charterlik reısterin toqtatý jaıynda bolýy múmkin», dep atap ótilgen derekkózde. Reseıde alǵash ret eýropalyq avıatasymaldaýshylarǵa Sibirden ushyp ótýge tyıym salýy múmkin ekeni týraly 5 tamyzda «Vedomostı» gazeti jazdy. Yqtımal tyıym salý saldarynan eń kóp British Airways, Lufthansa, Air France zardap shegedi. Tyıym salý týraly jańalyq Máskeý bırjasynda «Aeroflot» aktsııalarynyń quldyraýyna ákeldi. 6 tamyzda Eýrokomıssııanyń Germanııadaǵy ókili Rıhard Kıýnel EO óz avıakompanııalarynyń ushaqtarynyń Sibirdiń ústinen ushyp ótýine tyıym salynýyna jaýap retinde reseılik avıatasymaldaýshylarǵa qarsy shekteýler engizýleri múmkin ekendigin málimdedi. Reseı bıliginiń avıatsııadaǵy áreketi EO-nyń «Dobroletke» qatysty sanktsııasyna jaýapty qadamy boldy. Brıýssel «Aeroflottyń» enshiles uıymyn shildeniń aıaǵynda sanktsııa tizimine engizgen.
