Ýkraına ushaq apatyna Iran ashyq tergeý júrgizedi dep kútýde - Vladımır Zelenskıı

KIEV. ÝKRINFORM-QazAqparat – Ýkraına ushaq apatyna baılanysty Iran tarapy tolyq ári ashyq tergeý amaldaryn júrgizip, kináliler jaýapkershilikke tartylady kútip otyr. Bul týraly Ýkraına Prezıdenti Vladımır Zelenskıı Facebook-te málim etti, dep habarlaıdy «QazAqparat» HAA Ýkrınformǵa silteme jasaı otyryp.

«Búgingi kúnniń tańerteńi bizge jaıly bolǵan joq, alaıda aqıqattan habardar boldyq. Halyqaralyq komıssııanyń jumysy aıaqtalǵanǵa deıin, Iran jaǵy ýkraınalyq ushaq apatyna qatysty óziniń kinásin moıyndady. Degenmen de kináni tolyqtaı moıyndaýdy talap etemiz. Osy oraıda Irannan tolyq ári ashyq tergeý amaldaryn júrgizýge, kinálilerdi jaýapkershilikke tartýǵa, qaza bolǵandardyń máıitin qaıtarýǵa, ótemaqy tóleýge, dıplomatııalyq arnalar boıynsha resmı keshirim suraýǵa daıyn ekendikterin rastaıdy dep kútemiz», - dep atap ótti Prezıdent.

Sonymen qatar ol aldaǵy ýaqytta tergeý sharalary jasandy kidirý men kedergilersiz atqarylatynyna úmit artty.

«Ádil baǵa berý úshin bizdiń 45 mamanǵa barlyq málimetter qoljetimdi bolýy tıis jáne ózara is-qımyl sharalarymen qamtylýy kerek», - dep naqtylady Zelenskıı.

Eske salsaq, Iran Qarýly Kúshteri Bas shtabynyń habarlaýynsha, Tegeran mańynda sársenbi kúni qulaǵan ushaqty Irannyń Áýe qorǵanys kúshteri qyzmeti zymyranmen baıqaýsyzda atyp túsirgen.

Iran Prezıdenti Ýkraına ushaǵynyń qulaýyna kináliler qylmystyq jaýapqa tartylatynyn málim etti.

Osyǵan deıin Iranda 180 jolaýshysy bar Ýkraına ushaǵy qulaǵany týraly habarlandy.

Óz kezeginde Kanada premer-mınıstri Iran jolaýshylar laınerin abaısyzda atyp jiberý múmkin degen boljamyn jarııalaǵan bolatyn.