Ýkraına «Tuzaǵyn» Qazaqstanǵa tańýǵa kimder tyrysyp júr
ASTANA. KAZINFORM – Reseı-Ýkraına qaqtyǵysy aıasynda áleýmettik jelide Qazaqstanǵa baǵyttalǵan aqparattyq shabýylǵa qatysty saıasattanýshy Ádil Seıfýllın Kazinform agenttigine eksklıýzıv pikir bildirdi.
Sarapshy Ýkraınanyń «Tuzaq» operatsııasynyń maqsaty Ystanbuldaǵy aldaǵy kelissózderge áser etetindigine senimdi.
- Osynaý Qazaqstannyń janama kómegine qatysty kez kelgen daqpyrt perımetr boıyndaǵy barlyq jańa oıynshylardy teke-tires otyna tartý úshin óte yńǵaıly qozdyrǵysh bola alady. Degenmen, Qazaqstan geosaıası shabýyldar jaǵdaıynda arzanqol arandatýshylyqqa qarsy salqynqandy pragmatızmdi pash etýin jalǵastyryp keledi, - dep atap ótedi Ádil Seıfýllın.
Degenmen, medıada jáne Telegram keńistiginde Qazaqstandy «Reseı aýmaǵynda ýkraındyq drondardyń shabýylyna járdemin kórsetti» dep aıyptaıtyn jalǵan aqparattyń kezekti márte órtteı qaýlaýy naqty saraptamalyq baǵalaýdy talap etedi.
- Bul málimdemeler halyqaralyq arenada da, sonymen qatar qoǵamymyzdyń ishinde de elimizge senimdi úzýge baǵyttalǵan alypsatarlyqtan ózge dym da emes. Birinshiden, Qazaqstan barlyq halyqaralyq sanktsııalyq rejımdi dáıekti túrde saqtap keledi, – dedi sarapshy.
2022 jyldyń tamyzynan beri áskerı maqsattaǵy ónimderdi eksporttaýǵa tyıym qoldanysqa engizilgen. Munan bólek, 2023-2024 jyldary Astana áskerı maqsatta kez kelgen jaǵdaıda qoldaný múmkindigin boldyrmaý úshin qosarlanǵan maqsattaǵy taýarlardyń 100-den astamyn Reseıge eksporttaýdy doǵardy. Qazaqstan Reseıge, Ýkraınaǵa nemese janjalǵa qatysyp jatqan kez kelgen ózge tarapqa qarý-jaraq satpaıdy.
- Bul ustanym – bizdiń beıtaraptyǵymyz ben syrtqy saıasatymyzdyń beıbitsúıgishtiginiń bólshegi, - dedi ol.
Onyń aıtýynsha, ekinshiden, Reseı Federatsııasymen qazirgi taýar aınalymy tek beıbit, azamattyq jáne gýmanıtarlyq sıpatta ǵana. Sóz azyq-túlik, keńinen qoldanylatyn taýarlar, logıstıka, bilim jáne mádenı jobalar jaıynda ǵana bolyp otyr.
- Qazaqstan EAEO men TMD aıasynda Reseıdiń seriktesi bolyp qala beredi. Biraq, gýmanıtarlyq jáne áskerı yntymaqtastyqtyń ara-jigin naqty shekteıdi. Bul - áleýmettik jelilerdegi urandarǵa emes, naqtylanǵan is-qımyldarǵa negizdelgen resmı memlekettik ustanymnyń máni.
Úshinshiden, Qazaqstanǵa qatysty aıyptaýlar resmı organdardan emes, anonımdi Telegram-arnalar men baıaǵydan medıalyq qysym men gıbrıdtik áser etýdiń quralyna aınalǵan jekelegen «áskerı tilshiler» tarapynan shyǵyp jatyr. Olardyń maqsaty – Qazaqstan men onyń negizgi seriktesteri arasyna syna qaǵý, Astanany halyqaralyq qoǵamdastyqtyń kóz aldynda bedelin túsirý, Qazaqstannyń egemendigi men syrtqy saıasatynyń pragmatızmine kúmán keltirý, - dep atap ótedi saıasattanýshy.
Elimizdiń syrtqy ister mınıstrliginiń reaktsııasy birden ári birjaqty boldy: mundaı málimdemelerdiń eshqandaı negizi joq jáne el drondardyń logıstıkasyna da, soqqy jasaý operatsııasy úshin qandaı da jetkizilimderge de qatysty emes.
Ol qoǵam men memleket arasynda senimsizdik dánegin sebýge tyrysýdy, destrýktıvti ósek-aıań taratýdy gıbrıdtik qysym elementteri de atady.
- Buǵan qoǵamnyń myzǵymastyǵy, aqparattyq alańnyń kózqaraqtylyǵy jáne arandatýshylyqqa qatań toıtarys berý jaýap bolýy tıis. Qazaqstan – ózgeniń oıynynda qoldanylatyn qural emes.
Syrtqy saıasatymyz táýelsiz, syndarly jáne turaqty damýǵa, qaýipsizdikke jáne halyqaralyq legıtımdilikke baǵyttalǵan jáne de bul – feıktermen de, sanaly ýlaýmen de joıý múmkin emes «qyzyl syzyq», - dedi Ádil Seıfýllın.
Aıta keteıik, Ystanbulda Reseı men Ýkraına kelissóziniń ekinshi raýndy aıaqtaldy.