Ýkraına tóńireginde bastalǵan kelissóz oń nátıje beredi dep úmittenemiz — Shavkat Mırzıeev

TAShKENT. KAZINFORM — Álemniń túrli aımaǵynda bolyp jatqan qaqtyǵystar jahandyq jáne aımaqtyq beıbitshilik pen qaýipsizdikke úlken qater tóndiredi. Bul týraly Parlamentaralyq odaqtyń mereıtoılyq assambleıasynda sóz sóılegen Ózbekstan prezıdenti Shavkat Mırzıeev málim etti, dep habarlaıdy Kazinform agenttiginiń menshikti tilshisi.

Búgin Ózbekstan astanasynda Parlamentaralyq odaqtyń 150-shi assambleıasy ótti. Onyń barysynda sóz sóılegen prezıdent Shavkat Mırzıeev álemdegi geosaıası jaǵdaı men shıelenisterge toqtaldy.

— Ózbekstan kez-kelgen qaqtyǵys pen shıelenisti tek beıbit kelissóz arqyly sheshý prıntsıpin qoldaıdy. Ýkraına tóńiregindegi jaǵdaıǵa qatysty bastalǵan kelissózder oń nátıje beredi dep úmittenemiz. Biz eń ótkir máselelerdiń sheshimin BUU Jarǵysy men qararlary negizinde tabý mańyzdy dep sanaımyz. Sonymen, Palestına-Izraıl qaqtyǵysynyń jalǵyz jáne ádil sheshimi — «eki halyq úshin eki memleket» qaǵıdatyn ustaný jáne ony iske asyrý, — dedi Sh. Mırzıeev.

Buǵan qosa Ózbekstan basshysy Aýǵanstandaǵy jaǵdaıdy turaqtandyrýdyń mańyzdylyǵyn atap ótti.

— Kórshimiz Aýǵanstandy da umyt qaldyrmaýymyz kerek. Bul eldiń halyqaralyq arenadan oqshaýlanýyna jol bermeı, qazirgi bılikpen syndarly dıalog ornatyp, Aýǵanstandy Ortalyq Azııa aımaǵynyń ajyramas bóligi retinde qarastyrý mańyzdy dep sanaımyz, — deıdi Shavkat Mırzıeev.

Eske salaıyq, taıaýda «Ortalyq Azııa — Eýropa Odaǵy» sammıtine qatysqan Prezıdent Qasym-Jomart Toqaev Ýkraınaǵa qatysty kelissózderge toqtalǵan edi. Ol joly Memleket basshysy shıelenistiń oń sheshimin tabatynyna senim bildirdi.