Ýkraına soǵysty toqtatý úshin «qıyn qadamdar» jasaýy kerek – Marko Rýbıo

ASTANA. KAZINFORM – Memlekettik hatshy Marko Rýbıo Saýd Arabııasyna AQSh pen Ýkraınanyń resmı tulǵalary arasynda áskerı qaqtyǵysty toqtatý maqsatynda kelissózder júrgizý úshin keldi, dep habarlaıdy ABC News. 

Rýbıonyń málimdeýinshe, AQSh Ýkraınadan beıbit kelisimge qol jetkizý úshin qandaı jeńildikter jasaýǵa daıyn ekenin tikeleı estigisi keledi.

- Biz bul jerden eń mańyzdy nárse – Ýkraına qıyn qadamdarǵa barýǵa daıyn degen kúshti sezimmen ketýimiz kerek, sol sııaqty reseılikterdiń de bul qaqtyǵysty aıaqtaýǵa nemese qandaı da bir túrde toqtatý úshin qıyn qadamdar jasaýyna týra keledi, - dedi Marko Rýbıo. 

Seısenbi kúngi kelissóz prezıdent Donald Tramp pen Vladımır Zelenskııdiń Sopaq kabınettegi daýlasýynan keıingi eki jaqtyń alǵashqy kezdesýi bolmaq. 

Dúısenbide Rýbıo aldaǵy talqylaýda «oń kelisim» bolatynyna senim bildirip, áskerı kómek máseleleri sheshilýi múmkin ekenin aıtty. 

- Jaqsy kezdesý ótkizip, osy másele boıynsha jaǵymdy jańalyq jarııalaı alamyz dep senemin. Biz reseılikterge áskerı kómek kórsetpeımiz - dedi Marko Rýbıo.

Rýbıo áskerı barlaý derekterin Ýkraınamen bólisý jalǵasyp jatqanyn atap ótti. Buǵan deıin Tramp AQSh pen Ýkraına arasynda barlaý aqparatyn almasý qaıta jandanǵanyn málimdedi.

Hatshy Rýbıo paıdaly qazbalardy jetkizý týraly kelisim boıynsha jumys jalǵasyp jatqanyn, biraq seısenbidegi kelissózderdiń negizgi taqyryby bolmaıtynyn jetkizdi. 

- Osy kezdesýdiń mańyzdy sáti – eki jaqtyń nıetterin aıqyndaý, olardyń talaı ret jarııa túrde málimdegenindeı, beıbitshilikke jetýge degen umtylysy. Sodan keıin biz olardyń Reseı pozıtsııasynan qanshalyqty alys ekenin anyqtaýymyz kerek, biz ony áli bilmeımiz», - dedi Marko Rýbıo.

Buǵan deıin Vladımır Zelenskııdiń Er-Rııadta taq murageri Muhammed ben Salmanmen kezdesetinin jazǵan edik.