Ýkraına-Reseı kelissózi: Taraptar qaıta kezdesetin bolyp tarqasty

NUR-SULTAN. QazAqparat – Ýkraına men Reseı ókilderi Prıpıattegi kelissózderdiń alǵashqy raýndynan keıin óz elderiniń astanalaryna qaıtatyn boldy. Kelissózde aıtylǵan sharttardy sol jaqta pysyqtap, qaıta jolyǵatyn bolyp ýaǵdalasty. BELTA agenttigi Ýkraına Prezıdenti Keńsesi Basshysynyń keńesshisi Mıhaıl Podolıaktiń jýrnalısterge bergen málimetine súıenip osyndaı aqparat taratty, dep habarlaıdy QazAqparat tilshisi.

«Búgin Ýkraına men Reseı delegatsııasy kelissózderdiń birinshi raýndyn ótkizdi. Onyń negizgi maqsaty Ýkraınadaǵy atysty toqtatý jáne soǵys qımyldaryn talqylaý boldy. Taraptar belgili bir sheshimder belgilengen birqatar basym taqyryptardy anyqtady. Sol sheshimder boıynsha qandaı da bir konsýltatsııalar alý úshin qos taraptyń ókilderi óz elderiniń astanalaryna qaıtady. Sondaı-aq, qos tarap kelissózdiń ekinshi raýndyn ótkizý múmkindigin talqylady. Sol kezdesýde búgingi kelissózde aıtylǵan máseleler boıynsha naqty praktıkalayq sheshimder qabyldanýy múmkin», - dedi Mıhaıl Podolıak.

Al Reseı delegatsııasynyń jetekshisi, RF Prezıdentiniń kómekshisi Vladımır Medınskııdiń sózinshe, eki eldiń ókilderi talqylanatyn máseleler boıynsha negizgi baǵyttardy anyqtaǵan.

«Biz ortaq ustanymdardy boljaýǵa múmkindik beretin keıbir núktelerdi taptyq», - dedi Reseı tarapynyń ókili. Onyń aıtýynsha, taraptardyń kelesi kezdesýi Belarýs-Polsha shekarasynda ótedi.

«Reseı men Ýkraına Belarýstegi kelissózde bir-birin tyńdady», - dedi jýrnalısterge Reseı Federatsıııasy delegatsııasynyń múshesi, RF Memlekettik Dýmasynyń Halyqaralyq ister jónindegi komıtetiniń tóraǵasy Leonıd Slýtskıı.

Onyń sózine qaraǵanda, kelissózder barysynda atysty toqtatý jáne demılıtarızatsııa máseleleri talqylanǵan.

Aıta keteıik, búgin Ýkraına men Belarýs shekarasyndaǵy Gomel oblysynda Ýkraına-Reseı kelissózi bastalǵan bolatyn.