Ýkraına naqty qadamǵa daıyn: Zelenskıı Abý-Dabıdegi kelissózder aldynda kezdesý ótkizdi

ASTANA.KAZINFORM — Ýkraına prezıdenti Vladımır Zelenskıı AQSh pen Reseımen úshjaqty kezdesýlerdiń jańa kezeńi aldynda kelissóz tobymen kezdesý ótkizdi, dep habarlaıdy Kazinform. 

Ýkraına basshysynyń aıtýynsha, taraptar 4 jáne 5 aqpanda kezdesedi.

Kelissózderge Ýkraına Ulttyq qaýipsizdik keńesiniń hatshysy Rýstem Ýmerov, Prezıdent ákimshiliginiń basshysy Kırıll Býdanov, Prezıdent ákimshiligi basshysynyń birinshi orynbasary Sergeı Kıslıtsa, Ýkraına Qarýly kúshteri Bas shtabynyń bastyǵy Andreı Gnatov, Prezıdent ákimshiligi basshysynyń keńesshisi Aleksandr Bevz jáne «Halyq qyzmetshisi» fraktsııasynyń jetekshisi Davıd Arahamııa qatysady.

Zelenskıı óz komandasymen naqty maqsattar týraly kelisti. Ol ýkraın delegatsııasy amerıkalyq tarappen ekijaqty kezdesýler de ótkizetinin aıtty.

— Ýkraına naqty qadamǵa daıyn. Biz laıyqty jáne turaqty beıbitshilikke qol jetkizýge bolady dep sanaımyz. Biz AQSh-pen qaýipsizdik kepildigi týraly ekijaqty qujat daıyn dep sanaımyz jáne qalpyna keltirý jáne ekonomıkalyq damý týraly qujattar boıynsha odan ári naqty jumys isteýdi asyǵa kútemiz, — dep jazdy ol Telegram-da.

Ýkraına prezıdenti sonymen qatar amerıkalyq taraptyń dıalog úshin qajetti jaǵdaılardy qamtamasyz etýde tabandylyq tanytatynyn kútetinin málimdedi.

— Ótken juma kúni keshke kúshine engen deeskalatsııa sharalary halyqtyń kelissózder protsesine jáne yqtımal nátıjege degen senimin nyǵaıtýǵa kómektesedi. Soǵys aıaqtalýy kerek. Álemdegi kómektesip jatqan barshaǵa alǵys aıtamyn, — dedi ol.

Aıta keteıik, Ýkraına, Reseı jáne AQSh arasyndaǵy eki kúndik kelissózder qańtar aıynyń sońynda Abý-Dabıde aıaqtaldy. Taraptar 1 aqpanda kezdesýge kelisti. Alaıda, belgili bolǵandaı, kelissózderdiń kelesi kezeńi 4 jáne 5 aqpanǵa aýystyryldy.