Aqtóbede bıyl 130 adamdy túrli mamandyqtar boıynsha oqytý josparlanyp otyr

ASTANA. KAZINFORM — Aqtóbe qalasynda azamattardy jumyspen qamtý jáne jańa kásipterge úıretý baǵytynda keshendi jumystar qarqyndy júrgizilip jatyr. Bul týraly oblys ákimdiginiń baspasóz qyzmeti habarlady. 

Maqsat — ár adamnyń eńbek naryǵynda óz ornyn tabýyna jaǵdaı jasaý.

Mansap ortalyǵy arqyly turǵyndar qysqa merzimdi kásibı oqytý kýrstaryna qatysyp, suranysqa ıe mamandyqtardy tegin meńgerip júr.

Mekeme dırektory Aına Mýrzataevanyń aıtýynsha, bıyl 130 adamdy túrli mamandyqtar boıynsha oqytý josparlanǵan. Bul bastama «Eńbek naryǵyn damytýdyń 2024-2029 jyldarǵa arnalǵan tujyrymdamasy» aıasynda júzege asyp jatyr.

— Oqý merzimi — úsh aı. Tyńdaýshylarǵa memleket esebinen shákirtaqy (43 574 teńge) tólenip, medıtsınalyq tekserýden ótýge qosymsha tólemaqy qarastyrylǵan. Kýrsty támamdaǵandarǵa sertıfıkat tabystalyp, turaqty jumysqa ornalasýǵa qoldaý kórsetiledi. Bıyl shashtaraz, tiginshi, aspaz, kondıter, santehnık jáne esepshi sııaqty tanymal mamandyqtarǵa suranys joǵary. Qazirdiń ózinde 83 adam oqýyn aıaqtap, eńbek jolyn bastap ketken, taǵy 20 adam bilimin jalǵastyryp jatyr, — delingen aqparatta.

Sonymen qatar «Bastaý-Bıznes» jobasy arqyly turǵyndarǵa kásipkerlik negizderi úıretilip, óz isin ashýǵa 400 aılyq eseptik kórsetkishke deıin (1 572 800 teńge) memlekettik granttar berilńp jatyr. Grant ıegerleri bul qarjyny óndiris ashýǵa, qural-jabdyq alýǵa nemese ózin-ózi jumyspen qamtýǵa jumsaı alady.

Qoldaý ásirese áleýmettik osal toptarǵa — kópbalaly jáne az qamtylǵan otbasylarǵa, múmkindigi shekteýli jandarǵa, ataýly áleýmettik kómek alýshylarǵa, sondaı-aq qandastar men qonys aýdarýshylarǵa baǵyttalǵan.

Jastar da nazardan tys emes. «Jastar tájirıbesi», «Urpaqtar kelisimsharty» jáne «Alǵashqy jumys orny» baǵdarlamalary jas mamandarǵa alǵashqy eńbek tájirıbesin alýǵa múmkindik berip otyr. Qazirgi tańda eńbek naryǵynda býhgalter, tárbıeshi, balalar psıhologi, logoped-defektolog jáne medıtsına mamandaryna suranys joǵary.

Jumys izdep júrgen azamattar turǵylyqty jeri boıynsha Mansap ortalyǵyna júginip nemese www.egov.kz jáne Enbek.kz elektrondyq eńbek bırjasy arqyly tirkele alady.

Eske sala keteıik, buǵan deıin halyqty jumyspen qamtý baǵytynda aýdan jáne qala ákimderiniń KPI júıesi engiziletini týraly jazǵan bolatynbyz.