Ýkraına men Efıopııada referendým ýchaskeleri ashylmaıdy — SІM

ASTANA. KAZINFORM — Elimizdiń Syrtqy ister mınıstrligi Ýkraına men Efıopııada referendým ýchaskelerin ashpaý týraly sheshim qabyldady. Bul týraly Ortalyq referendým komıssııasynyń otyrysynda belgili boldy. 

Jıyndy komıssııa tóraǵasy Nurlan Ábdirov buǵan deıin shetelde 82 ýchaske ashylady degen málimet bolǵanyn atap ótti.

— Qazir sizderdiń bizge bergen málimetterińizge baılanysty bul san ózgerip otyr. 80 ýchaske shetelderde ashylady. Osy ózgeris nemen baılanysty ekenin túsindirip berseńiz, — dedi ol Syrtqy ister mınıstrliginiń erekshe tapsyrmalar boıynsha elshisi Erlan Álimbaevqa.

Mınıstrlik ókili qazirgi halyqaralyq jaǵdaıǵa baılanysty 64 emes 62 elde ornalasqan 80 ýchaskeni tirkeý týraly sheshim qabyldanǵanyn aıtty.

— Ol negizinen halyqaralyq jáne geosaıası jaǵdaıǵa baılanysty bolyp otyr. Onyń ishinde Ýkraına men Efıopııadaǵy ýchaskelerimizde referendým boıynsha daýys berýdi ótkizbeý týraly sheshim qabyldandy. Óıtkeni, Ýkraınadaǵy azamattarymyzdy sany kúrt azaıdy. Tirkeýde 500-deı azamatymyz bolǵan. Olardyń kóbi ol elde joq, syrtqa shyǵyp ketti. Kóbi Qazaqstanda júr. Al Efıopııada 5 azamatymyz tirkelgen. Olar — elshiliktiń qyzmetkerleri. Olardyń ekeýi ǵana sol jerde bolady. Ekeýi Kaırge baryp daýys beredi, — dedi Erlan Álimbaev.