Ýkraına men AQSh paıdaly qazbalar jónindegi kelisim týraly memorandýmǵa qol qoıdy

ASTANA.KAZINFORM  — Ýkraına men AQSh arasyndaǵy paıdaly qazbalar jónindegi kelisim aıasynda memorandýmǵa qol qoıyldy. Bul týraly Ýkraına birinshi vıtse-premeri — ekonomıka mınıstri ıÝlııa Svırıdenko málimdedi.

— Búgin biz AQSh-pen ekonomıkalyq seriktestik jónindegi kelisimge bir qadam jaqyndadyq. Ýkraına men Amerıka Qurama Shtattary memorandýmǵa qol qoıdy. Bul — bizdiń toptardyń konstrýktıvti birlesken jumysynyń dáleli jáne eki halyqqa da tıimdi bolatyn kelisimge qol jetkizýge degen umtylys, — dep jazdy ol óziniń Facebook paraqshasynda.

ıÝlııa Svırıdenkonyń aıtýynsha, Ýkraınada qalpyna keltirý jumystaryna baǵyttalǵan Investıtsııalyq qor qurý josparlanyp otyr.

— Atalǵan kelisim iri ınvestıtsııalar tartýǵa, ınfraqurylymdy jańǵyrtýǵa jáne Ýkraına men AQSh arasyndaǵy ózara tıimdi seriktestikti nyǵaıtýǵa múmkindik beredi. Sol sebepti qujatty ázirleý jumystary jalǵasyp jatyr, — dedi ol.

Onyń aıtýynsha, kelisim mátinin naqtylaý jáne oǵan qol qoıý alda tur. Odan keıin qujatty eki el parlamentteri ratıfıkatsııalaýy qajet.

AQSh pen Ýkraına arasyndaǵy paıdaly qazbalar týraly kelisimge dál bir aptadan keıin, 24 sáýirde qol qoıylady — bul týraly beısenbi kúni AQSh prezıdenti Donald Tramp málimdedi, dep habarlaıdy BBC.

Eske sala keteıik, 24 naýryzda AQSh prezıdenti Donald Tramp Amerıka ákimshiligi men Ýkraına bıligi sırek kezdesetin jer elementteri boıynsha kelisim jobasyn aıaqtap qalǵanyn jáne oǵan jaqyn arada qol qoıylatynyn málimdegen bolatyn. Kıev óz kezeginde AQSh-tyń AES-terge baqylaý júrgizý talabynsyz kelisimge qol qoıýǵa daıyn ekenin habarlady. Al 12 sáýirde Ýkraına men AQSh mıneraldar jónindegi kelisim boıynsha Vashıngtonda kelissózder ótkizgeni belgili boldy.