Ýkraına qazaqstandyq lokomotıvterdi satyp alýdy josparlaýda
ASTANA. QazAqparat - «Ýkraına temir joldary» AAQ Qazaqstan shyǵarǵan teplovozdardy satyp alýdy josparlap otyr, dep habarlaıdy QazAqparat «Qazaqstan temir joly» ulttyq kompanııasynyń baspasóz qyzmetine silteme jasap.
Ýkraına temirjol kompanııasynyń delegatsııasy «Lokomotıv qurastyrý zaýyty» AQ men «Elektrovoz qurastyrý zaýyty» JShS ónimderi men óndiristik qýatymen tanysty. Zaýyttarda TE33A jáne TEP33A serııaly teplovozdardyń, sondaı-aq KZ8A jáne KZ4A elektrovozdardyń tehnıkalyq tanystyrylymy ótti.
Astana qalasynyń eksplýatatsııalyq lokomotıvtik deposynda qazaqstandyq áriptester tehnıkanyń servıstik jáne kepildemelik qyzmet kórsetýin uıymdastyrý, ony paıdalaný boıynsha suraqtarǵa jaýap berdi. Ýkraına temirjol ákimshiliginiń ókilderi «QTJ» UK» AQ - «Temirjol kóligi qyzmetkerlerin damytý jáne baǵalaý ortalyǵy» bólimshesinde túrli mamandyqtar boıynsha bilikti kadrlar daıyndaý protsesimen tanysty.
Ýkraınalyq temirjol «General Electric Company» kompanııasymen shekti kelisimniń bastapqy kezeńin iske asyrý sheńberinde, 2018 jyldyń sońyna qaraı TE33AS serııaly teplovoz partııasyn alýdy josparlap otyr.
«Ýkraındyq áriptester GE kompanııasynyń qurylysy jáne dızeldik lokomatıvterdi paıdalanýdaǵy bizdiń tájirıbemizge qyzyǵýshylyq tanytyp otyr. Biz óz tarapymyzdan jetistikterimiz ben jumys isteý qaǵıdalarymyzben bólistik», - dedi «QTJ - Júk tasymaly» AQ operatsııalyq qyzmetter boıynsha vıtse-prezıdent Marat Shákenov.
Sondaı-aq, ol qazaqstandyq temirjolshylardyń seriktes elderdiń temirjol ákimshiligimen uzaq merzimge yntymaqtasýǵa jáne tájirıbe almasýǵa daıyn ekendikterin atap ótti.
