Ýkraına Qazaqstandaǵy jańa elshisiniń kandıdatýrasyn usyndy – Aıbek Smadııarov

ASTANA. QazAqparat – Ýkraına tarapy ózderiniń jańa elshisiniń kandıdatýrasyn usyndy. Bul týraly BAQ ókilderiniń qatysýmen ótken brıfıngte Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

Vedomstvo qabyrǵasynda ótken baspasóz brıfınginde BAQ ókilderi Aıbek Smadııarovtan Ýkraınanyń Qazaqstandaǵy jańa elshisi qashan taǵaıyndalatynyn surady.

«Ýkraına tarapy ózderiniń jańa elshisiniń kandıdatýrasyn usynǵan bolatyn. Ol kandıdatýrany biz qazir qarap jatyrmyz. Biz maquldamasaq, olar taǵaıyndalmaıdy. Tártip boıynsha solaı», - dep jaýap berdi ol.

Aıta keteıik, Ýkraınanyń Qazaqstandaǵy burynǵy elshisi Petr Vrýblevskıı 21 tamyzda qazaqstandyq bloger Dıas Quzaıyrǵa suhbat berip, óziniń qyzmet quzyretine saı kelmeıtin málimdeme jasaǵan edi. Keıin ol QR Syrtqy ister mınıstrligine shaqyryldy. Onyń kózqarasy men ustanymyna mınıstrlik pen Qazaqstan halqy Assambleıasy narazylyq bildirdi. Artynsha Petr Vrýblevskıı Qazaqstannan ketti.