Ýkraına Eýro-2012 chempıonaty kezinde túsetin kiristi sanady
ASTANA. 29 mamyr. QazAqparat - Ýkraınada ótetin fýtboldan Eýropa chempıonatynda týrızm kezinde túsetin kiris 1,3-1,5 mlrd. dollardy quraıdy, dep jazdy Lenta. rý.
Bul týraly vıtse-mınıstr jáne eldiń ınfraqurylym mınıstri Borıs Kolesnıkov málim etti. Onyń sózine qaraǵanda, Eýro-2012 kezinde Ýkraınaǵa 800 myńnan 1,2 mln.-ǵa deıin týrıst keledi.
Sáýir aıynda keıbir sarapshylar vıtse-mınıstrdiń kórsetkishinen áldeqaıda tómen somany boljaǵan bolatyn. Olardyń pikirinshe, Ýkraına eline Eýro-2012 chempıonatynan túsetin qarajat nebári 300-500 mln. dollardy quraıdy.
Kolesnıkov atap ótkendeı, Ýkraınanyń atalmysh chempıonatqa daıyndyǵy 99,9 paıyzǵa baǵalanýda. Ol sondaı-aq Eýro chempıonatyn ótkizýge eldiń 55 mln. dollary jumsalǵandyǵyn atap ótti. Bul qarajat saıystyń aqparattyq, jarnamalyq qoldaýy men qyzmetkerlerdiń til úırenýine jumsaldy.
Jalpy alǵanda, Ýkraına chempıonatty ótkizýge 5 mlrd. dollar jumsady, dep atap ótti mınıstr. Bul qarajat birinshi kezekte áýejaılar men joldar salýǵa jáne kólik ınfraqurylymyn jetildirýge jumsaldy.
Kolesnıkov, sonymen qatar, Polsha memleketi Eýro-2012 chempıonatynyń daıyndyǵyna 34 mlrd. dollar jumsaǵandyǵyn aıtty.
2012 jylǵy fýtboldan Eýropa chempıonatynyń aqtyq oıyndary 8 maýsymnan 1 shilde aralyǵynda Ýkraına men Polshada qatar ótkiziledi. Al dúbirli dodanyń qorytyndy matchy Kıevte ótetin bolady.
