Ýkraına Elshiliginde «Taras Shevchenko jáne Qazaqstan» degen taqyrypta dóńgelek ústel ótti

Mádenı is-shara barysynda sóz alǵan Elshi Nıkolaı Selıvon T.Shevchenkonyń arqasynda ýkraın halqy tarıhı betburys jasaǵandyǵyn atap ótip, ol bolmaǵanda ýkraın halqy tipti basqalarǵa sińip keter edi degen pikirin bildirdi. «Tarasty ýkraın halqynyń ákesi dep de ataýǵa bolady. Jazýshynyń arqasynda ádemi, zııaly, álem tanyǵan ýkraındyq mova tili qoldanysta qalyp otyr», dedi Elshi óz sózinde.

Dóńgelek ústel barysynda qalamgerdiń Ýkraınaǵa, sondaı-aq Qazaqstannyń qazirgi órkenıetine shyǵarmashylyǵymen, baı murasymen qatystylyǵy talqylady. Máselen, shara barysynda qalamger jaıynda áńgime órbitken L.Gýmılev atyndaǵy Eýrazııa ulttyq ýnıversıtetiniń professory Kúlpash Beıbitova 20 ǵasyrdaǵy qazaq qalamgerleriniń shyǵarmashylyǵyndaǵy ýkraındyqtar týraly kóterilgen taqyryptarǵa keńinen toqtala kelip, «Qazaq ádebıetiniń klassıgi Muhtar Áýezov barlyq túrki tildes ádebıetterge qyzyǵýshylyq tanytýymen qatar, orys jáne ýkraın ádebıetine de zor yqylas bólgen. Máselen, 1954 jyly ol T.Shevchenkonyń «Nazar Stodolıa» poemasyn qazaq tiline tárjimalaǵan», dedi.

Ómiriniń 10 jylǵa jýyq kezeńin Mańǵystaýda jer aýdarylyp júrip ótkizgen T.Shevchenko jergilikti halyqtyń tirshiligin, salt-dástúrine qatysty mol mura qaldyrǵan. Qalamgerlikpen qatar sýretshi retinde de tanylǵan ol qazaq ómirine qatysty «Kıiz úıde», «Sharqala», «Keli túıgen qazaq áıeli», «Qazaq qyzy Katıa», t.b. sýretter salǵan. Onyń shyǵarmalary Á.Tájibaev, T.Jarokov, Q.Bekhojın, S.Muqanov, S.Máýlenov syndy qazaq jazýshylarynyń tárjimalaýymen birneshe márte kitap bolyp jaryq kórdi.