Ýkraına boıynsha kelissózder: Pýtınniń amerıkalyq delegatsııamen kezdesýiniń nátıjeleri

ASTANA.KAZINFORM - Reseı prezıdenti Vladımır Pýtın 23 qańtar túninde AQSh prezıdenti Donald Tramptyń arnaıy ókili Stıven Ýıtkoffpen jáne kásipker Djared Kýshnermen kezdesti, dep habarlaıdy TASS.

Reseı prezıdentiniń kómekshisi ıÝrıı Ýshakov kezdesýdiń óte mazmundy, syndarly, ashyq ári senimdi bolǵanyn málimdedi.

Negizgi taqyryby Ýkraınadaǵy jaǵdaıdy retteýge arnalǵan kelissózder shamamen tórt saǵatqa sozyldy. Máskeý men Vashıngton qaýipsizdik máseleleri boıynsha Reseı-AQSh-Ýkraına úshjaqty jumys tobynyń alǵashqy otyrysy 23 qańtarda Abý-Dabıde (BAÁ) ótedi dep kelisti.

Taraptar sondaı-aq Gaza, Grenlandııa boıynsha «Beıbitshilik keńesin» jáne ekijaqty qarym-qatynastardy damytý máselesin talqylady jáne basqa da taqyryptar boıynsha tyǵyz baılanystardy saqtaýǵa kelisti.

TASS sonymen qatar Ýshakov pen prezıdenttiń arnaıy ókili Kırıll Dmıtrıevtiń Reseı tarapynan kezdesýge qatysqanyn habarlaıdy.

Pýtın qonaqtardy Máskeý Kremliniń Senat saraıynyń atqarýshy keńsesinde qabyldady. Reseı prezıdenti kómekshisiniń aıtýynsha, baılanystar erekshe mazmundy jáne syndarly boldy.

- Men kezdesýdiń óte ashyq jáne senimdi bolǵanyn aıtar edim, - dep qosty ol.

Abý-Dabıdegi kezdesýde reseılik kelissózder tobyn Reseı Qarýly Kúshteri Bas shtaby Bas basqarmasynyń bastyǵy Igor Kostıýkov basqarady. Reseı ókilderi BAÁ-ge aldaǵy saǵattarda ushady. Prezıdent kómekshisiniń aıtýynsha, topqa Qorǵanys mınıstrligi basshylyǵynyń ókilderi kiredi.

Ýshakovtyń habarlaýynsha, Pýtın Máskeý delegatsııasyna búgingi áńgimeniń barlyq málimetterin eskere otyryp, naqty nusqaýlar bergen.

Pýtınniń Ýıtkoffpen qazirgi kezdesýi olardyń jetinshi kezdesýi boldy. Reseı prezıdenti sońǵy ret AQSh kóshbasshysynyń arnaıy ókilimen 2025 jyldyń 2 jeltoqsanynda kezdesti. Kýshner bul joly da Ýıtkoffpen birge Reseıge ushty. Kelissózder bes saǵatqa sozyldy.

Buǵan deıin Ýkraına prezıdenti Zelenskıı BAÁ-de AQSh, Ýkraına jáne Reseı arasyndaǵy kelissózder ótetinin jarııalaǵan bolatyn.