UKP: Qaıyrymdylyqpen aınalysatyn kásipkerlerge salyqtyq jeńildikterdi kóbeıtý qajet
Onyń aıtýynsha, UKP QR Parlamenti májilisine qaıyrymdylyq, demeýshilik jáne metsenattyq týraly zań jobasyn joldaǵan.
"Biz bul zań jobasy qabyldansa, oń áser beredi dep esepteımiz. Sebebi osy ýaqytqa deıin qaıyrymdylyq, metsenattyq jáne demeýshilik degen uǵym bolǵan joq. Sondyqtan da bolar, ol esh yntalandyrylmady", - dedi N. Áltaev.
"Zań jobasynyń aıasynda biz qaıyrymdylyqpen aınalysatyn kásipkerlerge salyqtyq jeńildikterdi 3 paıyzdan 10 paıyzǵa deıin joǵarylatýdy surap otyrmyz", - dedi ol.
Onyń sózine qaraǵanda, atalmysh zań jobasy keıbir memlekettik organdardyń tarapynan belgili bir qarsylyqqa ıe bolýda, ásirese Qarjy mınıstrligi buǵan oń qabaq tanytpaı otyr.
"Salyqtyq yntalandyrýlar boıynsha jańashyldyqtar memlekettik organdardyń qarsylyǵyna tap bolyp jatyr. Onyń ishinde Qarjy mınıstrligi bunymen kelispeýde. Zań qabyldansa, salyqtyq túsimder azaıatyny sózsiz. 10 paıyz jeńildik jasalyp tursa, bıýdjetke qanshama qarajat túspeıdi degen sóz. Biraq memleket keıin áleýmettik salaǵa qyrýar qarajat salýǵa májbúr bolyp jatady. Sonda qarajattyń sonsha sendelýi ne úshin kerek? Aqshany alyp, keıin bıýdjet esebinen tenderler jarııalaý... Kásipkerlerdi yntalandyrý arqyly ǵana osynyń barlyǵyn sheshýge bolar edi. Salyqtan jınalǵan qarajatqa qaraǵanda, kásipkerlerdiń bólgen qarjysy da áldeqaıda joǵary bolady", - deıdi Áltaev.
Onyń habarlaýynsha, Charity Aid Fondation (CAF) qory jasaǵan zertteý kórsetkendeı, Qazaqstan qaıyrymdylyq kólemi boıynsha 135 eldiń ishinde 101-orynda tur.
"Bul qazaqstandyqtar qaıyrymdylyqpen aınalyspaıdy degen sóz emes. Aınalysady, biraq onyń barlyǵy kóleńkede, tasada qalyp jatyr", - dedi UKP tóraǵasynyń orynbasary.
Bunyń aldynda habarlanǵandaı, Qazaqstannyń qaıyrymdylyq salasynda 2 mlrd. teńgeden astam qarajat "kóleńkede" qalyp otyr.