Úkimettiń ishki qaryzdarǵa qyzmet kórsetý shyǵyndary 41 ese artqan

ASTANA. KAZINFORM — Joǵary aýdıtorlyq palata múshesi Nurlan Nurjanov byltyr eldiń syrttan qaryz tartý kórsetkishi 5,7 ese ulǵaıǵanyn málim etti.

— 2024 jyly syrttan qaryz tartý 5,7 ese ulǵaıdy. Bul strategııanyń ózgergenin jáne valıýta táýekelderi ósýi yqtımal ekenin kórsetip otyr. Memlekettik jáne úkimettik borysh JІÓ-ge qatysty lımıtter sheginde qalǵanmen, absolıýtti mánde ájeptáýir óskenin kórsetti, — dedi ol Májilistegi otyrysta.

Joǵary aýdıtorlyq palata Qarjy mınıstrligi Qazynashylyq komıtetiniń jumysyna da aýdıt júrgizgen eken.

— Aýdıt kezeńinde ishki qaryzdar boıynsha túsimderdiń bastapqy jospary men baǵaly qaǵazdar shyǵarý grafıginiń arasynda alshaqtyq anyqtaldy. Mysaly, qazynashyl basqarý shotynda 250 mlrd teńge qaldyq bola tura, somasy 150 mlrd teńge artyq qaryz tartý bıýdjet shyǵyndaryna ákeldi. Naqtyraq aıtsaq, 39 kúnge syıaqylardan túsken kiris nebári 24 mln teńge bolsa, qyzmet kórsetý shyǵyndary 41 ese ósip, 981 mln teńge bolǵan. Osylaısha, ishki boryshty basqarý praktıkasy tıimsiz ekenin kórsetip, 2021-2023 jyldary ishki qaryzdarǵa qyzmet kórsetýdiń somasy 125 mlrd teńgeniń yqtımal shyǵyndaryn ákelip otyr, — dedi Nurlan Nurjanov.

Sondaı-aq, ol Úkimet byltyr bıýdjettiń shyǵys bóligin 13 ret ózgertkenin atap ótti.