Qosylǵan qun salyǵynyń mólsherlemesi saralanyp belgilenýge tıis - Prezıdent

ASTANA. KAZINFORM - Bul týraly Memleket basshysy otandyq bıznes ókilderimen kezdesýinde aıtty. Prezıdent «Onyń joǵarǵy shegi týraly sheshimdi Úkimet naqty esepteýler negizinde qabyldaýy kerek» ekenin atap ótti. 

президент
Фото: Ақорда

– Kez kelgen reformany jan-jaqty saraptap, baıyppen júrgizgen jón. Ekonomıka salalarynyń erekshelikterin eskere otyryp, túrli nusqalardy ázirleý kerek.

Qosymsha qun salyǵyna qatysty buǵan deıin kózqarasymdy bildirmegen edim. Óıtkeni qyzmettik dárejeme sáıkes, meniń árbir sózim, pikirim qatań tapsyrma sııaqty qabyldanady. Soǵan qaramastan bul másele boıynsha oıymdy jetkizgim keledi.

Qalaı desek te, qosymsha qun salyǵynyń mólsherlemesi saralanyp belgilenýge tıis.

Úkimet túpkilikti sheshimdi bilikti sarapshylardyń, qaıtalap aıtamyn, bilikti sarapshylar men kásipkerlerdiń, álbette depýtattardyń pikirine qulaq asa otyryp, naqty esepteýler negizinde qabyldaǵany durys.

Bir anyǵy, Úkimettiń qazirgi usynyp otyrǵan mólsherlemesi tym joǵary. Sizder naqty tsıfrdy aıttyńyzdar. Ony qoǵam qyzý talqylady. Tipti, keı jaǵdaıda artyq sózder de aıtyldy. Degenmen, bul qoǵam talqysyna aldyn ala salynǵan usynys bolatyn. 

Taǵy qaıtalap aıtamyn, Úkimettiń bul baǵyttaǵy jumysy bıznes, qoǵam, kásipkerler, sarapshylardyń, ıaǵnı barlyq taraptyń pikiri eskerile otyryp jalǵasýy kerek.

Bıyl naqty sheshim qabyldanýǵa tıis.

Men buǵan deıin de aıttym: Úkimet bul máseleni depýtattarmen jáne sarapshylarmen egjeı-tegjeıli talqylaýy kerek.

Búgin aıtylǵan oı-pikirler de eskeriledi. Memleketke barynsha ońtaıly sheshim qajet, ıaǵnı bir jaǵynan bıznes júrgizýge kedergi keltirmeı, qolaıly jaǵdaı jasaıtyn, al ekinshi jaǵynan, salyqqa qatysty tártipti kúsheıtip, bıýdjet kirisin arttyratyn tıimdi joldy tabýymyz qajet, – dedi Qasym-Jomart Toqaev.

Memleket basshysy elimizdiń qarjylyq turaqtylyǵyn jetekshi reıtıng agenttikteriniń boljamdary rastap otyrǵanyna nazar aýdardy.

– Keıbir «sarapshylar» aıtyp júrgendeı, el ekonomıkasynyń jaǵdaıy sonshalyqty múshkil degen pikirmen kelispeımin. Salymyz sýǵa ketetindeı kúıde emespiz. Biraq bosańsýǵa da bolmaıdy. Iá, ekonomıkada 4,8 paıyzdyq ósim bar. Úkimet otyrysynda munyń Qazaqstan úshin jetkiliksiz ekenin aıttym. Úkimet damýdyń jańa dańǵylyn izdeýi kerek. Bul rette bıznes qoǵamdastyqtyń róli úlken. Halyqaralyq qarjy uıymdary memlekettik qaryz deńgeıin «asa joǵary emes», ıaǵnı basqarýǵa ıkemdi dep baǵalap otyr. Qaryzdy basqarý saıasaty bekitilgen qarjylyq shekteýlerdi qatań saqtaý arqyly júrgiziledi. Kiris deńgeıin arttyrý esebinen bıýdjet tapshylyǵyn azaıtý kózdelgen. Bul memlekettiń boryshyn tómendetýge múmkindik beredi. Sondaı-aq uzaqmerzimdi ekonomıkalyq ósimdi qamtamasyz etedi, – dedi Prezıdent.

Aıta keteıik, buǵan deıin Premer-mınıstrdiń orynbasary QQS boıynsha sheshim qabyldaý merzimine túsinik bergen bolatyn.

Сейчас читают