Úkimettiń daǵdarysqa qarsy sharalary ınflıatsııanyń baıaýlaýyna yqpal etti — UB
ASTANA. KAZINFORM — 2025 jylǵy qazannan bastap jyldyq ınflıatsııanyń baıaýlaýy baıqaldy. Bul týraly Úkimet otyrysynda Ulttyq bank tóraǵasynyń birinshi orynbasary Erulan Jamaýbaev aıtty.
— Naýryz aıynda álemdegi geosaıası shıelenis jalǵasyp, shıkizat naryqtarynda jaǵdaı qubylmaly boldy. Degenmen, ishki ekonomıkada oń úrdister baıqaldy. Naýryzdyń qorytyndysy boıynsha iskerlik belsendilik ındeksi 49,5 tarmaqty qurady. Bul beıtarap mánderge jaqyn. Óndiris pen qyzmetter boıynsha iskerlik belsendilik oń aımaqta saqtaldy. Olardyń ındeksteri tıisinshe 50,5 jáne 50,7 tarmaq boldy. Bıznes klımat ındeksi jaqsaryp, 4,7 tarmaqty qurady. Bul ahýal oń baǵalanyp otyr. Naýryzda jyldyq ınflıatsııa tómendep, 11 paıyz deńgeıinde qalyptasty. Azyq-túlik taýarlary baǵasynyń ósýi eń kóp úles qosty — dedi ol.
Onyń aıtýynsha, jyldyq kórsetkish keıbir tamaq ónimderiniń álemdegi joǵary baǵasyna jáne ishki óndiristegi shyǵynnyń ósýine baılanysty 11,7 paıyzdy qurap otyr.
— Azyq-túlikke jatpaıtyn ınflıatsııa 11,3 paıyz, aqyly kórsetiletin qyzmet ınflıatsııasy 10 paıyz boldy. 2025 jylǵy qazannan bastap jyldyq ınflıatsııanyń baıaýlaýy baıypty qatań aqsha-kredıt saıasatyna, teńge baǵamynyń nyǵaıýyna, sondaı-aq Úkimettiń daǵdarysqa qarsy sharalaryna, atap aıtqanda turǵyn úı-kommýnaldyq qyzmetter tarıfteriniń jáne janar-jaǵarmaı qunynyń kóterilýine qoıǵan moratorııge baılanysty boldy, — dedi Erulan Jamaýbaev.
Buǵan deıin bıyl 3 aıda jalpy ishki ónim 3 paıyzǵa óskenin jazǵan edik.
