Úkimettiń aldynda sapaly ekonomıkalyq ósimdi qamtamasyz etý mindeti tur — Memleket basshysy
ASTANA. KAZINFORM — Prezıdent Qasym-Jomart Toqaev sońǵy jyldary básekelestiktegi artyqshylyqtarymyzdy tolyq ashýǵa, ekonomıkalyq ósimniń tyń múmkindikterin tabýǵa, ınvestıtsııa tartýǵa jáne kásipkerlik bastamalardy yntalandyrýǵa baǵyt alǵanymyzdy aıtty, dep habarlaıdy Aqordanyń baspasóz qyzmeti.
Toqaev ınflıatsııanyń sharyqtaýyna jol berýge bolmaıtynyn basa aıtty, sebebi ol halyqtyń ál-aýqatyn arttyrýǵa baǵyttalǵan barlyq áreketti joqqa shyǵarady.
— Joldaýda ınflıatsııanyń sharyqtaýyna jol berýge bolmaıtynyn aıttym. Óıtkeni ınflıatsııa azamattardyń ál-aýqatyn arttyrýǵa baǵyttalǵan barlyq sheshim men áreketti joqqa shyǵarady. Bul oraıda óte qatań bıýdjet tártibin ornatpasa bolmaıdy. Qarjy tek ishki jalpy ónimniń ósýine, Qazaqstannyń álemdik arenada laıyqty ornyn alýyna yqpal etetin basym jobalar men baǵdarlamalarǵa ǵana jumsalýy tıis, — dedi ol.
Prezıdent aýyl sharýashylyǵy ónimderimen, halyq kúndelikti tutynatyn taýarlarmen qamtamasyz etý máselesi tolyq sheshilmeı kele jatqanyn alǵa tartty.
— Import óte kóp. Ol kózge anyq kórinip tur. Birqatar taýar nomenklatýrasy boıynsha syrttan keletin ónimge tym táýeldimiz. Qazaqstanda buǵan jol berýge bolmaıdy. Onyń ústine bıyl memleket tarapynan aýyl sharýashylyǵyna 1 trıllıon teńge qoldaý jasaldy. Bul — rekordtyq kórsetkish. Al elimiz shyǵaratyn ónim kólemi 2024 jyldyń qorytyndysy boıynsha 8,5 trıllıon teńgege baǵalandy, — dedi Qasym-Jomart Toqaev.
Memleket basshysy «Qazaqta «Jaqsylyq júrgen jerde tapshylyq bolmaıdy» degen sóz bar ekenin eske saldy. Onyń sózinshe, bıylǵy «Paryz» baıqaýyna qatysýshylar túrli qaıyrymdylyq sharalarǵa 37 mıllıard teńgeden astam qarjy salǵan.
— Bul otandyq bıznestiń qoǵam ıgiligi úshin aıanbaı adal qyzmet etýge daıyn ekendigin kórsetedi. Osynda otyrǵan ár azamattyń týǵan elge degen yqylas-peıili jas kásipkerlerge úlgi-ónege bolary sózsiz. Sizderge taǵy da shynaıy rızashylyǵymdy bildiremin! Kásipterińiz alǵa basa bersin! Barshańyzǵa amandyq, tabys tileımin! — dep túıindedi Prezıdent.
Osyǵan deıin Prezıdent elimizde tabysty bıznespen aınalysýǵa qolaıly jaǵdaı jasalǵanyn aıtqan bolatyn.