Úkimettiń aldynda alpınızmdi sporttyń bir túri retinde jan-jaqty dáripteý mindeti tur — Toqaev
ASTANA. KAZINFORM — Qasym-Jomart Toqaev Ervand Tıhonovıchtiń asyl qasıetteri men adamdarǵa, ásirese, alpınısterge degen shynaıy qamqorlyǵyn joǵary baǵalady, dep habarlaıdy Aqordanyń baspasóz qyzmeti.
Prezıdenttiń sózinshe, alpınızm men taý týrızmin naǵyz ómir mektebi dep ataýǵa bolady. Ol myqtylardy shyńdaıdy, óz ortańda jaýapty bolýǵa baýlıdy.
— «Adam ómiri eń joǵary sporttyq jetistikterden qundy» degen teńeýińiz alpınıster arasynda qanatty sózge aınalyp ketti. «Alpınızm — adam men tabıǵat arasyndaǵy shahmat oıyny» dep dál aıtqansyz. K2 (Chogorı) shyńyn betke alǵan komandańyzdyń alaı-túleı boranǵa tap bolǵany málim. Sol sátte shyńnyń ushar basyna qol sozym jer qalǵanyna qaramastan, keri qaıttyńyz. Mundaı sheshim qabyldaý ońaı emes. Osydan-aq dana, meıirban jan ekenińizdi ańǵaramyz. Jetistik pen jeńiske eshqashan masattanǵan emessiz. Bárine belgili, úırenshikti baǵyttarmen júrgende de saqtyqty umytpadyńyz. Kez kelgen joryqqa osylaı tyńǵylyqty daıyndalý dańqty alpınıst, sportshy, tálimger retinde sizdiń «tólqujatyńyzǵa» aınaldy, — dedi Memleket basshysy.
Prezıdent elimizde alpınızmdi nasıhattaýda Ervand Ilınskııdiń orasan jumys atqarǵanyn atap ótti.
— Asqar shyńdarǵa qushtarlyq, taýǵa shyǵý — áýestik qana emes, qorshaǵan ortany qasterlep, lastamaýǵa úndeıtin aıryqsha ekologııalyq ómir salty. Jańa Konstıtýtsııada kórinis tapqan tabıǵatty aıalaý, ekologııalyq mádenıet jáne tazalyq qaǵıdattary ulttyq bolmysymyzben bite qaınasyp ketýge tıis. Taý tabandylyqqa, tártip pen janashyrlyqqa úıretedi. Bıikke kóterilgen adam rýhtanady. Dál osy sebepti alpınızm men taý týrızmin naǵyz ómir mektebi dep ataýǵa bolady. Ol myqtylardy shyńdaıdy, óz ortańda jaýapty bolýǵa baýlıdy. Bul mádenı ári psıhologııalyq fenomendi barynsha qoldap, ony jastar tárbıesinde paıdalanýymyz kerek. Úkimettiń, salalyq mınıstrliktiń aldynda alpınızmdi sport jáne zamanaýı taý týrızminiń bir túri retinde jan-jaqty dáripteý mindeti tur. Memleket pen demeýshilerdiń qarjysyn tarta otyryp, naqty is-qımyl baǵdarlamasyn ázirleý qajet. Memleket bul ózekti mindetti sheshýdi qolǵa alady, oǵan tıisti nazar aýdarylady, — dedi ol.
Osyǵan deıin Prezıdent Ervand Ilınskııge «Qazaqstannyń Eńbek Eri» ataǵyn tapsyrǵanyn jazǵanbyz.
