Úkimettiń 100 jańa polıgon salý jospary qalaı oryndalyp jatyr

ASTANA. KAZINFORM – 2024 jyldyń qorytyndysy boıynsha elimizde 2 973 polıgon bolǵan, alaıda olardyń 20%-ynda ǵana (608) qajetti ruqsat qujattary bar. Bul týraly QR Ekologııa jáne tabıǵı resýrstar vıtse-mınıstri Mansur Oshýrbaev aıtyp berdi. 

− Olqylyqty túzetý úshin Úkimet 2023 jyly 100 jańa polıgon salý, jumys istep turǵan 8 polıgondy keńeıtý jáne 5 polıgondy rekýltıvatsılaý jónindegi keshendi jospardy bekitti. Búgingi tańda ákimdikter 7 jańa nysan salyp, paıdalanýǵa berdi, olar Qostanaı oblysynyń Lısakovsk qalasynda, Aqtóbe oblysyndaǵy Mártók, Qobda jáne Qaraýlkeldi aýdandarynda, Qaraǵandy oblysy Abaı qalasynda, Mańǵystaý oblysynyń Túpqaraǵan aýdanynda jáne Qyzylorda oblysynyń Syrdarııa aýdanynda, - dedi M. Oshýrbaev Prezıdent janyndaǵy Ortalyq kommýnıkatsııalar qyzmetinde ótken brıfıngte.

Sonymen birge, 23 polıgon boıynsha jobalyq qujattamany ázirleý aıaqtaldy jáne taǵy 18 joba ázirlenip jatyr. 

Oǵan qosa, mınıstrlik 11 óńirde 43 polıgon qurylysyna qarajat bólý máselesin pysyqtaýda, onyń boljamdy jalpy quny – 53 mlrd teńge.

Eske sala ketsek, «Taza Qazaqstan» aktsııasy aıasynda ótken jyldan beri el boıynsha 1,4 mln tonna qaldyq jınalyp, 2,4 mln aǵash otyrǵyzyldy. Aktsııaǵa shamamen 9 mln adam qatysqan, onyń ishinde 450 myń erikti bar.

Byltyr Telegram-da iske qosylǵan @TazaQazBot turǵyndardyń 22 myń shaǵymyn qabyldady, onyń 21 myńnan astamy oryndaldy.