Úkimettik jumys toptary Qostanaı jáne Atyraý oblystaryndaǵy jylytý maýsymyna daıyndyq barysyn tekserdi

ASTANA. KAZINFORM – Prezıdent tapsyrmalaryn júzege asyrý aıasynda Úkimet óńirlerdiń aldaǵy jylytý maýsymyna daıyndyǵyn keshendi túrde qadaǵalaýdy jalǵastyryp keledi. 

Premer-mınıstr Oljas Bektenovtiń tapsyrmasymen Qostanaı, Atyraý oblystarynda jylý jáne energııamen qamtamasyz etý nysandaryna tekseris júrgizildi. Premer-mınıstr keńesshileri Nurlan Uranhaev pen Eraly Toǵjanov jetekshilik etken úkimettik ınspektsııa quramynaǵy memlekettik baqylaýshylar kommýnaldyq nysandardyń jaı-kúıimen tanysty.

Rýdnyı men Qostanaı qalalarynda jylý elektr ortalyqtary men jelilerinde jóndeý jumystary josparǵa sáıkes júrip jatyr jáne aıaqtalýǵa jaqyn. Qostanaıdaǵy sý tazartý qurylymdaryn qaıta jańǵyrtý jumystary jalǵasyp jatyr.

Atyraý oblysynda turǵyn úı qory jylytý maýsymyna 80% daıyn, bilim berý nysandary 96%, densaýlyq saqtaý nysandary 90%. 723 qazandyqtyń 593-i (82%) aldaǵy jylytý maýsymyna daıyn tur. Atyraý JEO-da jylý jáne týrboagregattardy jóndeý jumystary kestege saı júrgizilip jatyr, qyrkúıek aıynyń sońyna deıin aıaqtalady. Sonymen qatar oblys ortalyǵyndaǵy jylý jelileriniń jalpy uzyndyǵy 601 shaqyrymdy quraıdy, tozý deńgeıi orta eseppen 52%. Negizgi kommýnaldyq kásiporyn 2030 jylǵa deıin jelilerdi kezeń-kezeńimen jańǵyrtý josparyn jasaǵan.

Jylytý maýsymyna daıyndyq Úkimettiń erekshe baqylaýynda. 

Aıta ketelik Úkimette ishki qajettilikterdi qamtamasyz etý máseleleri qaraldy.