Úkimettik emes uıymdardyń qyzmetine qatysty zań jobalary qoǵamdyq talqylaýǵa shyǵaryldy
ASTANA. KAZINFORM — «Ashyq NQA» ınternet-portalynda «Úkimettik emes uıymdar týraly» jáne «Qazaqstan Respýblıkasynyń keıbir zańdaryna úkimettik emes uıymdar máseleleri boıynsha ózgerister men tolyqtyrýlar engizý týraly» zań jobalary jarııalandy.
Qujattar úkimettik emes uıymdardy damytý maqsatynda quqyqtyq negizderdi qalyptastyrýǵa jáne memlekettik organdarmen baılanysyn nyǵaıtýǵa baǵyttalǵan. Sondaı-aq áleýmettik qyzmetterdiń sapasyn arttyrý, áleýmettik baǵdarlamalar men jobalardyń tıimdiligin kúsheıtý jáne azamattyq bastamalardy qoldaý kózdelgen.
Zań jobalary qabyldanǵan jaǵdaıda úkimettik emes uıymdar men azamattyq qoǵam qurylymdarynyń qyzmetin quqyqtyq retteý tetikteri jetildiriledi. Memleket pen azamattyq qoǵam arasyndaǵy baılanys nyǵaıyp, memlekettik qoldaý sharalaryn jáne volonterlik qyzmetti damytýǵa jaǵdaı jasalady.
Budan bólek, tsıfrlyq quraldardy engizý jáne tıisti salalardaǵy memlekettik organdardyń ókilettikterin naqtylaý qarastyrylǵan.
Mádenıet jáne aqparat mınıstrligi barlyq múddeli azamat pen uıymdy zań jobalaryn qoǵamdyq talqylaýǵa qatysýǵa shaqyrady.
Zań jobalaryna siltemeler:
https://legalacts.egov.kz/npa/view?id=15934318
https://legalacts.egov.kz/npa/view?id=15934345
Aıta keteıik, Astanalyq oqýshynyń ekologııalyq jobasy mınıstrlikke usynyldy.
