Úkimette Jumysshy mamandyqtary jylyn ótkizý jónindegi respýblıkalyq komıssııanyń otyrysy ótti
ASTANA. KAZINFORM - Úkimette QR Premer-mınıstriniń orynbasary Tamara Dúısenovanyń tóraǵalyǵymen Jumysshy mamandyqtary jylyn ótkizý jónindegi respýblıkalyq komıssııanyń birinshi otyrysy ótti.
Bul týraly Úkimettiń baspasóz qyzmeti habarlady.
Respýblıkalyq jáne óńirlik deńgeıdegi is-sharalar jospary qaraldy.
Jalpy jospar 70 qadamnan turatyn 7 negizgi baǵytty qamtıdy. Onyń negizinde 20 aımaqtyq bastama belgilendi. Olardyń aıasynda jumysshy mamandyqtardy daıarlaý júıesin jetildirý, mektep oqýshylaryna kásiptik baǵdar berý, jumys berýshilerdi ortaq iske qatystyrý sekildi áreketter qarastyrylǵan.
Oqý-aǵartý vıtse-mınıstri Edil Ospan bıyl elimizde 12 iri respýblıkalyq jáne halyqaralyq shara uıymdastyrylatynyn baıandady. Olardyń alǵashqysy aqpan aıynda elordada ótpek. «EXPO» kórme ortalyǵynda «Jumysshy mamandyqtary qalasy» atty biregeı festıval josparlanǵan. 5 kúndik is-sharada bolashaq mamandyqtar, ınnovatsııalyq tehnologııalardy kórsete otyryp, jumysshy mamandyqtardyń áleýetin pash etý kózdelgen. Festıvalde ekonomıkanyń naqty sektoryndaǵy suranysqa ıe baǵyttarǵa arnalǵan pavılondar jumys istemek. Oǵan barlyq óńirdegi iri kásiporyndar, salalyq odaqtar jumyldyrylady.
Sondaı-aq otyrysta «Samuryq-Qazyna» ulttyq ál-aýqat qorynyń Jumysshy mamandyqtary jyly aıasynda atqaratyn sharalary men aldaǵy josparlary qarastyryldy. Oǵan tıesili kompanııalar tobynda 255 myńnan asa adam qyzmet atqarady, olardyń 190 myńǵa jýyǵy jumysshy mamandyq ókilderi. Áli de 5 myń mamanǵa suranys bar. Sondyqtan oqý oryndarymen dýaldy oqytý jónindegi kelisimder, bos oryndar jármeńkeleri, jas mamandardy damytý boıynsha baǵdarlamalardy júzege asyrý kózdelip otyr.
«Samuryq-Qazyna» AQ 2032 jylǵa deıin 46 iri ınvestıtsııalyq jobany júzege asyrýdy josparlap otyr. Onyń aıasynda jalpy sany 64 myńnan asa jumys orny qurylady. Aktsıonerlik qoǵam jumysshy mamandardy ázirleýge at salysýǵa múddeli.
Salalyq mınıstrliktiń usynǵan sharalar tizbeginde Ortalyq Azııa elderi ókilderiniń qatysýymen ІS3 halyqaralyq forýmy, respýblıkalyq INNOVATION hakatony, sondaı-aq, alǵash ret Aqtaý qalasynda TURKICSKILLS kásiptik sheberlik chempıonaty da bar.
Sonymen qatar komıssııa nazaryna iri kásiporyndardyń Jumysshy mamandyqtary jyly aıasynda josparlaǵan sharalary da usynyldy. ERG, Allur Group kompanııalarynyń ókilderi salalyq oqý oryndarymen áriptestik qarym-qatynasy, jumysshylarǵa kórsetiletin áleýmettik qoldaý sharalary, aldaǵy ýaqyttaǵy josparlary týraly baıandady.
«Eń negizgi maqsat – jumysshy mamandardyń mártebesi men bedelin kóterý ekenin umytpaǵan jón. Bul rette barlyq múddeli memlekettik organdar, jergilikti ákimdikter, kásiporyndar men maman daıarlaıtyn oqý oryndarynyń úılesimdi jumysy mańyzdy. Sondyqtan josparda kórsetilgen sharalardyń merziminde ári sapaly oryndalýyn qamtamasyz etýdi tapsyramyn», — dedi Tamara Dúısenova.
Vıtse-premer jumysshy mamandardyń mártebesi men bedelin kóterý isi tek bir jylmen shektelmeıtinine basa mán berip, bul baǵyttaǵy jumys turaqty túrde júrgiziletinin aıtty.
Komıssııanyń kezekti otyrystary kóshpeli formatta aı saıyn ótkizilmek. Onda josparǵa sáıkes atqarylǵan sharalar saralanyp, tıisti nátıje shyǵarylyp otyrady.
Osyǵan deıin jumysshy mamandyqtaryn dáripteý úshin Astanada atqarylyp jatqan sharalar týraly jazǵan edik.