Úkimette jylý berý maýsymyna daıyndyǵy tómen oblystar ataldy
ASTANA. KAZINFORM – Búgin Úkimet otyrysynda Ónerkásip jáne qurylys mınıstri Ersaıyn Naǵaspaev jylý berý maýsymyna daıyndyq aıasynda tıisti jumystardy baıaý atqaryp jatqan óńirlerdi atady.
- Aldaǵy jylý berý maýsymyna daıyndyq aıasynda óńirlerde tıisti jumystar júzege asyp jatyr. Búginde 10 913 bilim berý nysanynyń on 10 693-i daıyn, bul kórsetkish 98% boldy. 8 óńirde daıyndyq kórsetkishi 100%-ǵa jetti. Jospardan Almaty men Aqtóbe oblystary qalyp otyr, - dedi E.Naǵaspaev.
Sonymen qatar ol densaýlyq saqtaý nysandary boıynsha da osyndaı jaǵdaı qalyptasqanyn aıtty. Qazirgi kezde daıyndyq 98%-ǵa jetti, ıaǵnı 5 394 nysannyń 5 281-i daıyn. 6 óńirde daıyndyq kórsetkishi 100%-ǵa jetti. Tómen kórsetkish Shymkent pen Almaty qalalarynda baıqaldy.
- Turǵyn úıler boıynsha jylytý maýsymyna daıyndyq jumystary 51 391 úıde aıaqtaldy, bul jospardyń 96%-y. Túrkistan oblysynda turǵyn úı qorynyń daıyndyǵy tolyq qamtamasyz etildi. Shyǵys Qazaqstan oblysy men Shymkent qalasynda turǵyn úılerdiń daıyndyq deńgeıi tómen. Óńirlerde ınjenerlik ınfraqurylymǵa da jóndeý jumystary júrgizilip jatyr. Búginde 1 808 shaqyrym sýmen jabdyqtaý jelisiniń 1 303-i jóndelgen. Bul jospardyń 72%-y. Jóndeý jumystary 6 óńirde tolyq aıaqtaldy. Tómen kórsetkishter Almaty, Jambyl oblystarynda oryn alyp otyr, - dedi mınıstr.
Onyń aıtýynsha, sý burý jelileri boıynsha jospardyń 74%-y, ıaǵnı josparlanǵan 306 shaqyrymnyń 225 shaqyrymy oryndaldy.
Buǵan deıin habarlanǵandaı, jańa jylý berý maýsymyna daıyndyq jumystary bastalǵannan beri (2026 jyldyń 1 mamyrynan 17 tamyzǵa deıin) respýblıka boıynsha temirjol kóligimen 19 mln tonna kómir tasymaldandy.
