Úkimette jańartylatyn energetıka, sýdy tuşytý jáne «jasyl» sýtegi óndirý máseleleri talqylandy
ASTANA. KAZINFORM – Qazaqstan Premer-mınıstriniń birinshi orynbasary Roman Sklıar ACWA Power kompanııasynyń bas dırektory Marko Archellımen kezdesý ótkizdi. Bul týraly Úkimettiń baspasóz qyzmeti habarlady.
ACWA Power kompanııasy – sýdy tuşylandyrý boıynsha álemdegi eń iri jeke kompanııa jáne dástúrli energııa kózderinen ekologııalyq taza tehnologııalarǵa kóshý salasyndaǵy kóshbasshy, sonyń ishinde «jasyl» sýtegi óndirýde jetekshi kompanııa bolyp sanalady.
Marko Archellı ACWA Power kompanııasynyń Qazaqstandaǵy ınvestıtsııalyq portfelin keńeıtýge daıyn ekenin jáne jańartylatyn energııa, sýdy tuşylandyrý jáne «jasyl» sýtegi óndirisi salalarynda yntymaqtastyqty nyǵaıtýdyń mańyzyn atap ótti. Ol Qazaqstannyń keń tabıǵı resýrstarymen jáne strategııalyq ornalasýymen osy tehnologııalardy damytýdaǵy úlken áleýetin erekshe atap ótti.
Kezdesý qorytyndysy boıynsha Roman Sklıar Qazaqstan Úkimeti ACWA Power kompanııasymen yntymaqtastyqqa úlken mán beretinin jáne aldaǵy ýaqytta da tyǵyz qarym-qatynasqa daıyn ekenin rastady.
Buǵan deıin Premer-mınıstrdiń birinshi orynbasary Roman Sklıar Dalian Hesheng Holding kompanııasynyń (QHR) tóraǵasy Van Venfengpen kezdesti. Kompanııa astyqty tereń óńdeý zaýytyn salý jobasyn iske asyrýdy josparlap otyr.
