Úkimette Ulttyq bilim berý derekter qoryn jańǵyrtý barysy qaraldy
ASTANA. KAZINFORM – Premer-mınıstrdiń birinshi orynbasary Nurlybek Nálibaev Ulttyq bilim berý derekter qoryn jańǵyrtý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Onyń barysynda Oqý-aǵartý mınıstri men «Qazaqtelekom» AQ basqarma tóraǵasynyń Ulttyq bilim berý derekter qoryn jańǵyrtý barysy jáne onyń negizinde Ulttyq bilim berý platformasyn damytý jónindegi atqarylyp jatqan jumystar týraly esebi tyńdaldy.
Shymkent qalasy, Túrkistan, Aqtóbe jáne Almaty oblystary ákimderiniń orynbasarlary óńirlerdegi bilim berý uıymdaryn tsıfrlandyrý boıynsha atqarylyp jatqan jumystar týraly baıandady.
Jańartylǵan júıe arqyly 1-synypqa qabyldaýǵa 490 myńnan astam ótinish onlaın rejımde berilgen. Tehnıkalyq, orta bilimnen keıingi jáne kásiptik bilim berý uıymdaryna qabyldaý úderisi tolyq avtomattandyrylǵan. Nátıjesinde kolledjderge oqýǵa 220 myńnan astam talapker túsken.
Nurlybek Nálibaev Ulttyq bilim berý platformasyn engizý halyqqa bilim berý salasyndaǵy memlekettik qyzmetterdi avtomattandyrýdy qamtamasyz etýmen qatar, bıýdjet qarajatyn edáýir únemdeýge, únemdelgen qarajatty bilim berý salasyndaǵy basqa da qajettilikterge baǵyttaýǵa múmkindik beretinin atap ótti.
Keńes qorytyndysy boıynsha múddeli memlekettik organdarǵa tıisti tapsyrma berildi.
Aıta keteıik, elimizde bıylǵy 1 qyrkúıekten bastap shaǵyn jınaqty mektepterge jasandy ıntellektini engizý boıynsha pılottyq joba iske qosyldy.
