Týrızmdi damytý: Úkimette úılestirý keńesiniń alǵashqy otyrysy ótti
ASTANA. KAZINFORM – Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Týrızm salasyn damytý máseleleri jónindegi úılestirý keńesiniń alǵashqy otyrysy ótti. Keńes 2026 jylǵy sáýirde týrızm salasyndaǵy ortalyq memlekettik organdardyń, bıznes ókilderi men sarapshylar qaýymdastyǵynyń jumysyn úılestiretin turaqty vedomstvoaralyq alań retinde qurylǵan.
Otyrysqa Týrızm jáne sport, Ekologııa jáne tabıǵı resýrstar, Tsıfrlyq damý, ınnovatsııalar jáne aeroǵarysh ónerkásibi mınıstrlikteriniń, jergilikti atqarýshy organdardyń, sondaı-aq bıznes-qoǵamdastyqtyń ókilderi qatysty.
Úılestirý keńesiniń basty maqsaty – saladaǵy júıeli kedergilerdi joıý, naqty qoldanbaly sheshimder ázirleý jáne týrızm baǵytyndaǵy jobalardyń iske asyrylýyn jedeldetý. Keńestiń qurylýy týrızm salasyn keshendi basqarý qajettiliginen týyndap otyr. Óıtkeni bul baǵyt ınfraqurylym, ınvestıtsııa, kólik, ekologııa, vızalyq-kóshi-qon retteýi jáne tsıfrlandyrý sııaqty ózara baılanysty birneshe salany qamtıdy.
Jıyn barysynda týrızm jáne sport vıtse-mınıstri Baýyrjan Rapıkov Týrıstik salany damytýdyń 2029 jylǵa deıingi tujyrymdamasyn iske asyrý jónindegi jańartylǵan is-qımyl josparyn tanystyrdy. Qujatta alty negizgi baǵyt boıynsha 61 is-shara qarastyrylǵan. Olardyń qatarynda ınfraqurylymdy damytý, ınvestıtsııalyq ahýaldy jaqsartý, týrıstik ónimderdi qalyptastyrý jáne salany ilgeriletý máseleleri bar.
Otyrysta halyqaralyq qonaqúı brendteriniń Qazaqstan naryǵyndaǵy úlesin arttyrý jáne elimizdiń týrıstik áleýetin sheteldik naryqtarda júıeli túrde ilgeriletý máselelerine erekshe nazar aýdaryldy. Sonymen qatar avtotýrızm, at týrızmi, gastronomııalyq týrızm jáne MICE-týrızm sııaqty baǵyttardy damytý, is-sharalar kúntizbesin jetildirý jáne vızalyq saıasatty ońtaılandyrý máseleleri qaraldy.
Budan bólek, ańshylyq týrızmniń áleýeti men onyń damýyna kedergi keltirip otyrǵan faktorlar talqylandy. Ulttyq parkterdegi ekotýrızmdi damytý, týrıstik júktemeni retteý, sondaı-aq tarıhı-mádenı mura obektilerin týrıstik aınalymǵa engizý máseleleri de keńinen qarastyryldy.
Keńes qorytyndysy boıynsha Aıda Balaeva týrızmniń el ekonomıkasyn damytýǵa tikeleı yqpal etetin mańyzdy salalardyń biri ekenin atap ótti. Ol óńirlermen ózara jumysty kúsheıtýdi, ár oblystyń ereksheligin, týrıstik áleýetin jáne ınfraqurylymdyq múmkindikterin eskere otyryp, naqty ári egjeı-tegjeıli josparlar ázirleýdi tapsyrdy.
Aıta keteıik, Qazaqstanda týrızmge tartylǵan ınvestıtsııalar 1,2 trln teńgeden asty.
