Úkimette tsıfrlandyrý, básekelestik jáne EAEO naryǵyna qol jetkizý máselesi talqylandy
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Alqa múshesi – Eýrazııalyq ekonomıkalyq komıssııanyń básekelestik jáne monopolııaǵa qarsy retteý mınıstri Maksım Ermolovıchpen kezdesti.
Kezdesý barysynda taraptar básekelestik pen monopolııaǵa qarsy retteý salasyndaǵy ózara is-qımyl máselesin keńinen talqylady. Júıeli ózara is-qımyl qurý, úzdik tájirıbelerdi úırený men salalyq organdar arasyndaǵy yntymaqtastyqty damytý tásili qaraldy.
– Memlekettik satyp alýdy tsıfrlandyrý, básekelestikti damytý jáne EAEO naryǵyna teń qol jetkizý bizdiń ózara is-qımylymyzdyń negizgi baǵyty bolyp qala beredi. Kedergilerdi joıýǵa jáne bıznestiń múmkindigin arttyrýǵa arnalǵan júıeli jumysty qurý mańyzdy, — dep atap ótti Serik Jumanǵarın.
Memlekettik satyp alý sheńberinde ózara taýar jetkizýdi arttyrý, sondaı-aq EAEO-ǵa múshe memleketter ónimderiniń odaq elderiniń naryǵyna shyǵýyn qamtamasyz etý tásilin pysyqtaýǵa erekshe nazar aýdaryldy. Osy jónindegi ózara is-qımyl tetigin odan ári jetildirýdiń mańyzdylyǵy atalyp ótti.
Sondaı-aq aldaǵy V Eýrazııalyq ekonomıkalyq forým sheńberinde básekelestik jáne monopolııaǵa qarsy retteý jónindegi bloktyń is-sharalaryn daıyndaý jáne ótkizý máselesi boıynsha pikir almasty. Atap aıtqanda, memlekettik satyp alýdy tsıfrlandyrý men jasandy ıntellekt tehnologııasyn paıdalaný, básekelestik saıasatta zamanaýı quraldardy qoldaný máselesine arnalǵan taqyryptyq sessııalar talqylandy.
– Eýrazııalyq ekonomıkalyq forým — bul biregeı alań. Halyqaralyq uıymdardyń, BRIKS, EYDU áriptesterin shaqyra otyryp, taqyryptyq sektsııalardyń mazmunyn molaıtý mańyzdy. Qazaqstanda jyl saıyn Eýrazııalyq monopolııaǵa qarsy forým ótkizilse, básekelestik quqyq boıynsha bilim berý baǵdarlamalary da jumys isteıdi. Biliktilikti arttyrý boıynsha da júıeli jumys qurylǵan. Biz yntymaqtastyqqa, tájirıbe men aqparat almasýǵa ázirmiz, — dep atap ótti vıtse-premer.
Kezdesý qorytyndysy boıynsha taraptar derekter almasyp, saraptamalyq ózara is-qımylǵa, kadrlyq áleýetti damytýǵa, yntymaqtastyqty odan ári nyǵaıtýǵa daıyn ekendigin rastady.
Eske salsaq, Oljas Bektenov EAEO-daǵy júk aǵyndaryn úılestirýdiń ıntegratsııalanǵan platformasyn qurý kerek ekenin aıtty.
