Úkimette ishki qajettilikterdi qamtamasyz etý máseleleri qaraldy

ASTANA. KAZINFORM – Premer-mınıstrdiń birinshi orynbasary Roman Sklıar energetıka vıtse-mınıstri Álibek Jamaýov pen qarjy vıtse-mınıstri Erjan Birjanov, ishki ister mınıstriniń orynbasary Igor Lepehı, Qarjy monıtorıngi agenttigi tóraǵasynyń orynbasary — Qaırat Bıjanova, sondaı-aq Ulttyq qaýipsizdik komıteti Shekara qyzmeti ókilderiniń qatysýymen otandyq JJM naryǵyndaǵy aǵymdaǵy jaǵdaı boıynsha keńes ótkizdi. Bul týraly Úkimettiń baspasóz qyzmeti habarlady. 

Kún tártibinde ishki naryqty janar-jaǵarmaımen turaqty qamtamasyz etý jáne shekara mańy oblystaryndaǵy munaı ónimderiniń aınalymyna baqylaýdy kúsheıtý máseleleri qaraldy.

Energetıka mınıstrliginiń málimetinshe, naryqtaǵy jaǵdaı turaqty, qajetti otyn qory jetkilikti.

Jıyn sońynda Premer-mınıstrdiń birinshi orynbasary jaýapty memlekettik organdarǵa munaı ónimderiniń zańsyz aǵynyna jol bermeý jáne memlekettik shekarada baqylaýdy, onyń ishinde óńirlerde taýarlar qozǵalysy men otyn shyǵynyna monıtorıng júrgizý arqyly baqylaýdy kúsheıtý boıynsha egjeı-tegjeıli jospar ázirleýdi tapsyrdy.

Roman Sklıar memlekettiń basty mindeti ishki qajettilikterdi qamtamasyz etý ekenin atap ótti. Baǵadaǵy alshaqtyq pen logıstıka tapshylyqtyń paıda bolýyna jaǵdaı jasamaýy kerek.

Atalǵan másele Úkimettiń baqylaýynda. 

Aıta ketelik Oljas Bektenov jerde sırek kezdesetin metaldar salasyn damytý jóninde keńes ótkizgen edi.