Úkimette salyq reformasyn engizý barysy jáne bıznesti qoldaý sharalary talqylandy
ASTANA. KAZINFORM — Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen Salyq kodeksin engizý jobasy keńsesiniń ekinshi otyrysy ótti. Bul týraly Úkimettiń baspasóz qyzmeti habarlady.
Talqylaýdyń negizgi baǵyty shaǵyn jáne mıkro bıznes úshin eń sezimtal máseleler, onyń ishinde «taza paraqtan» salyqtyq retteý tetikteri boldy.
Eń aldymen ótpeli kezeńdegi salyqtyq ákimshilendirýge naqty túzetýler qarastyryldy. Atap ótilgendeı, «taza paraq» túzetýleri boıynsha shaǵyn jáne mıkro bıznes 2026 jyldyń 1 qańtaryna deıin salyqtyq jáne kameralyq tekserýlerden, sondaı-aq ákimshilik jaýapkershilikten bosatylady. Degenmen, buǵan deıin Memlekettik kirister komıteti resmı arnalar arqyly habarlaǵan birqatar erekshelikter qarastyrylǵan.
— 2025 jylǵy 17 jeltoqsanda Úkimet ótpeli kezeńge salyqtyq ákimshilendirýdi túzetý týraly sheshim qabyldady. Atalǵan sheshimdi júzege asyrý maqsatynda osy jyldyń 1 sáýirine deıin salyq bereshegin tóleýge jatatyn ósimpuldar men aıyppuldardy esepten shyǵarý qaǵıdalary ázirlendi, kásipkerlik sýbektilerin taratý jáne toqtatý rásimderi qaıta qaraldy, sondaı-aq shaǵyn jáne mıkro bızneske qatysty keńselik aýdıt júrgizý tásilderine ózgerister engizildi. «Ashyq normatıvtik quqyqtyq aktiler» portalynda tıisti normatıvtik quqyqtyq aktilerdiń jobalary ornalastyryldy jáne aqpan aıynyń basynda qabyldanady dep josparlanyp otyr, — dep atap ótti Memlekettik kirister komıteti tóraǵasynyń orynbasary Jánibek Nurjanov.
2026 jylǵa deıin QQS boıynsha esepke qoıýǵa baılanysty buzýshylyqtar boıynsha ákimshilik ister qozǵalmaıtyny, al buryn memlekettik kirister organdary shyǵarǵan ister toqtatylatyny aıtyldy. Bul sharalar bıznestiń salyqtyq ákimshilendirýdiń jańa sharttaryna barynsha qolaıly ótýin qamtamasyz etýge baǵyttalǵan.
Otyrys qorytyndysy boıynsha Memlekettik kirister komıteti men «Atameken» Ulttyq kásipkerler palatasy kásipkerlerdiń qatysýymen normatıvtik standarttardy «taza paraqtan» bastap qoldaný tájirıbesin túsindirý maqsatynda keńeıtilgen keńes ótkizýge kelisti.
Ótken aptada Memlekettik kirister komıtetine call-ortalyǵy men Salykbot Telegram boty arqyly 19 400, Ulttyq ekonomıka mınıstrligine 50, «Atameken» Ulttyq kásipkerler palatasyna 14 ótinish kelip túsken. Suraqtardyń negizgi legi Memlekettik kirister komıtetiniń arnalary arqyly kelip túsedi. Kásipkerlerdi kóbinese salyq rejımin tańdaý, salyq tóleýshiniń shotynda jumys isteý, elektrondy shot-faktýralardy shyǵarý, aǵymdaǵy protsedýralyq máseleler qyzyqtyrady. Mundaı ótinishter boıynsha túsiniktemeler dereý beriledi. Júıeli júrgizilgen aqparattyq-túsindirý jumystarynyń nátıjesinde Memlekettik kirister komıtetiniń call-ortalyǵynyń júktemesi tómendedi: buryn kúnine 5500-ge jýyq qońyraý tússe, qazirgi ýaqytta bul shamamen kúnine 4700-ge jýyqtady.
Ulttyq ekonomıka mınıstrligi men «Atameken» Ulttyq kásipkerler palatasynda júıeli máseleler jınaqtalǵan. Olardyń qatarynda uzaqmerzimdi kelisimsharttar boıynsha QQS mólsherlemelerin qoldaný, MIB-ke salyq salý, múgedekterdi jumysqa alatyn uıymdarǵa salyq salý sharttary, medıtsına salasynda ártúrli QQS stavkalary men jeńildikterdi qoldaný, sondaı-aq, ózin-ózi jumyspen qamtyǵandar úshin qyzmet túrleriniń tizbesin keńeıtý jatady.
Osyndaı úndeýlerdiń bir mysalyn «Atameken» Ulttyq kásipkerler palatasy tóraǵasynyń orynbasary Tımýr Járkenov keltirdi. Másele medıtsına salasyndaǵy QQS boıynsha jeńildikterdi joıýǵa qatysty. Salyq kodeksine sáıkes, dárilik zattardy ótkizý jáne ımporttaý boıynsha QQS bosatý tek tegin medıtsınalyq kómek kórsetý men mindetti medıtsınalyq saqtandyrý memlekettik qory, sondaı-aq áleýmettik mańyzy bar jáne orfandyq aýrýlardy emdeý úshin ǵana saqtalady. Bul rette kommertsııalyq segmentte satylatyn dárilik zattarǵa, medıtsınalyq maqsattaǵy buıymdarǵa, sondaı-aq olardy óndirýge arnalǵan materıaldar men komponentterge 2026 jyldan bastap 5% jáne odan ári 10% stavka boıynsha QQS salynady. Bul, bıznes ókilderiniń pikirinshe, sońǵy tutynýshylar úshin shyǵyndardyń ósýine ákelýi múmkin.
Sonymen qatar belgilengen shekti baǵalar boıynsha kommertsııalyq segmentte dárilik zattar men medıtsınalyq maqsattaǵy buıymdar tapshylyǵynyń táýekelderi, sondaı-aq farmatsevtıkalyq sýbstantsııalar, dári-dármekter men medıtsınalyq maqsattaǵy buıymdar óndirýge arnalǵan jabdyqtardy ótkizý jáne ımporttaý boıynsha aınalymdarǵa 16% bazalyq mólsherleme boıynsha QQS salynatyny qosymsha atap ótildi.
Serik Jumanǵarın salyq organdarynyń aqparattyq júıelerin paıdalaný boıynsha aýqymdy túsindirý jumystaryn júrgizý qajettiligi týraly máselege arnaıy toqtaldy. Tsıfrlyq qyzmetterdiń belsendi damýy kezinde barlyq paıdalanýshynyń ózgeristerge beıimdelýge ýaqyty bola bermeıtini atap ótildi. Osyǵan baılanysty naqty oqytý algorıtmin, onyń ishinde tsıfrlyq kómekshilerdi paıdalaný, sondaı-aq bıznespen turaqty keri baılanysty qamtamasyz etý qajet.
Júıelik suraqtar pýlyn qalyptastyrý jumystary osy aptada jalǵasady. Jobalyq keńse deńgeıinde sheshim qabyldaýdy talap etetin máseleler dúısenbige josparlanǵan kelesi otyrysta qaraýǵa shyǵarylady.
Aıta ketelik áleýmettik mańyzy bar azyq-túlik taýarlarynyń baǵa ındeksi ósken joq.