Úkimette iri ónerkásip jobalaryn júzege asyrý boıynsha keńes ótti
ASTANA. KAZINFORM - Premer-mınıstr Oljas Bektenov hımııa jáne metallýrgııa salalarynda joǵary deńgeıde óńdelgen ónim shyǵaratyn klaster qurýǵa baǵyttalǵan iri ónerkásip jobalaryn júzege asyrý máseleleri boıynsha keńes ótkizdi, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń tapsyrmasyna sáıkes, eksportqa baǵdarlanǵan óndiristi qalyptastyrý jumystary júrgizilýde.
Ónerkásip jáne qurylys mınıstri Ersaıyn Naǵaspaev búginde jalpy ınvestıtsııa kólemi shamamen $10 mlrd jáne 8,7 myńnan astam turaqty jumys ornyn ashatyn 5 iri bastamanyń júzege asyrylyp jatqanyn baıandady.
Abaı oblysynda qýattylyǵy 300 myń tonna katodty mys balqytý zaýytynyń qurylysy júrgizilýde. Investıtsııanyń jalpy kólemi $1,5 mlrd-qa jetedi. Zaýyt jumys istep turǵan Bozshakól, Aqtoǵaı jáne Shyǵystústimet ken oryndarynan kontsentrattardy óńdeýge arnalǵan. 1 myńnan astam turaqty jumys ornyn ashý kózdelgen. Búgingi tańda joba Biryńǵaı ındýstrııalandyrý kartasyna engizilip, ınfraqurylymǵa qosylý boıynsha is-sharalar júrgizilýde.
Qaraǵandy oblysynda «Qarmet» AQ óndiris kólemin arttyra otyryp mashına jáne avtomobıl jasaý kásiporyndary úshin ónimniń jańa túrlerin shyǵarý arqyly aýqymdy jańǵyrtý baǵdarlamasyn iske asyryp jatyr. Investıtsııa kólemi $3,5 mlrd-ty quraıdy. 2028 jylǵa deıin jyl saıyn 9 mln tonnaǵa deıin kómir óndirýdi, 5 mln tonnaǵa deıin temir keni kontsentraty men bolat óndirýdi qamtamasyz etý josparlanýda. 2 myń jańa jumys orny ashylady. Buǵan deıin júrgizilgen jumystardyń nátıjesinde 2024 jyly óndiristik qyzmet tolyq qalpyna keltirildi, jabdyqtardy kúrdeli jóndeý aıaqtaldy, 8 shahtanyń 7-eýinde kómir óndirý jumystary júrgizilýde, bul óndirý kólemin 7%-ǵa arttyrýǵa múmkindik berdi.
Qostanaı oblysynda «SSKÓB» AQ bazasynda qýaty jylyna 2 mln tonna, quramynda 90%-dan astam temir bar ystyq brıkettelgen temir óndiretin zaýyt salý josparlanýda. Kásiporyn metallýrgııada ekologııalyq taza tehnologııalardy engizý úshin tirek nysanyna aınalady. Búgingi tańda halyqaralyq qarjy ınstıtýttarynyń qatysýymen gaz jetkizý, ınfraqurylymǵa qosylý jáne qarjylandyrý kózderi máseleleri pysyqtalýda. Investıtsııalardyń jalpy kólemi $1,2 mlrd-ty quraıdy. Jobany júzege asyrý nátıjesinde 1 myń turaqty jumys orny ashylady.
Batys Qazaqstan oblysynda «Satımola» ken orny bazasynda kalıı hlorıdin shyǵarý boıynsha baıytý-óndiristik keshen salý jobasy iske asyrylýda. Kásiporyn qýatyn jylyna kalıı hlorıdin 12 mln tonnaǵa deıin birtindep arttyra otyryp, tórt kezeń boıynsha iske qosylady dep josparlanýda. Qazirgi ýaqytta jobada burǵylaý jumystary júrgizilýde, jer telimderi alyndy, taý jynystaryn muzdatý úderisteri iske qosyldy, syrtqy ınfraqurylym qalyptasýda. Jobanyń jalpy quny $2,4 mlrd-tan asady.
Sondaı-aq Premer-mınıstrge Mańǵystaý oblysyndaǵy «KazAzot Prime» JShS ammıak-karbamıd kesheniniń qurylysy týraly baıandaldy. Joba ishki naryqtyń mıneraldy tyńaıtqyshtarǵa degen suranysyn qamtamasyz etedi. Іske asyrý nátıjesinde 700 jumys orny ashylady. Іske qosý 2029 jyly kútilýde. Investıtsııa kólemi shamamen $1,5 mlrd.
Keńes barysynda zamanaýı ónerkásiptik klasterlerdi qalyptastyrýǵa keshendi kózqarastyń qajettiligi atap ótildi.
«Osy sektorlardaǵy jańa jobalar qosylǵan quny joǵary ónim shyǵarýǵa, zamanaýı tehnologııalardy engizýge jáne básekege qabiletti klasterlerdi qalyptastyrýǵa baǵyttalǵan ındýstrııalyq ósýdiń berik tuǵyryna aınalýy tıis. Olardyń aınalasynda shaǵyn jáne orta bıznes kásiporyndary, servıstik kompanııalar, logıstıkalyq ortalyqtar jáne zamanaýı ınfraqurylym belsendi túrde damýy kerek.
Biz myńdaǵan jańa jumys ornyn qurýǵa, barlyq óńirdiń ekonomıkasyn jandandyrýǵa múmkindik beretin qýatty mýltıplıkatıvtik áserge senemiz», — dep atap ótti Oljas Bektenov.
Memlekettik organdarǵa jobalardy júzege asyrýǵa sapaly qoldaý kórsetýdi qamtamasyz etý tapsyryldy. Ónerkásip jáne qurylys, Ulttyq ekonomıka mınıstrlikteri barlyq jobalardy ýaqtyly iske qosý sharalaryn qabyldaýy kerek.
Osyǵan deıin Úkimettiń 2027 jylǵa qaraı statıstıkalyq esepterdiń sanyn 50% qysqartatyny týraly jazdyq.