Úkimette Petropavl qalasynyń áýejaıyn damytý máseleleri qaraldy
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaev Petropavl qalasynyń áýejaıyn damytý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Keńeske Soltústik Qazaqstan oblysynyń ákimi, Kólik, Energetıka mınıstrlikteri basshylarynyń orynbasarlary jáne «Qyzyljar halyqaralyq áýejaıy» JShS basshysy qatysty.
Keńes barysynda Memleket basshysynyń áýejaı ınfraqurylymyn damytý, eldiń tranzıttik-kólik áleýetin arttyrý, zamanaýı avıatsııalyq habtardy qalyptastyrý jónindegi tapsyrmalaryn oryndaý maqsatynda Petropavl qalasynyń áýejaıynyń ınfraqurylymyn jańǵyrtý, marshrýttyq jelini keńeıtý, jolaýshylar, júk tasymaly kólemin arttyrý máseleleri qaraldy.
2025 jyly áýejaı 132,5 myń jolaýshyǵa qyzmet kórsetti, bul 2021 jylmen salystyrǵanda 6,5 ese kóp. Sońǵy jyldary janarmaı quıý kesheniniń jumysy qalpyna keltirilip, túngi reısterdi oryndaýǵa qoıylǵan shekteýler alynyp tastaldy.
Aldaǵy ýaqytta ushý-qoný jolaǵyn rekonstrýktsııalaý, halyqaralyq baǵyttardy damytý, avıatsııalyq otynnyń turaqty jetkizilýin qamtamasyz etý jáne mýltımodaldy logıstıkalyq ınfraqurylymdy qalyptastyrý josparlanýda.
Sonymen qatar jolaýshylar aǵyny az óńirlik áýejaılardy damytý, olardyń turaqty jumys isteýin qamtamasyz etýge, ınfraqurylymyn jańǵyrtýǵa, marshrýttyq jelini keńeıtýge, óńirlerdiń kólik qoljetimdiligin arttyrýǵa erekshe nazar aýdaryldy.
Keńes qorytyndysy boıynsha memlekettik organdar men uıymdarǵa áýejaı ınfraqurylymyn odan ári damytý, josparlanǵan jobalardy ýaqtyly iske asyrý, eldiń tranzıttik áleýetin tıimdi paıdalaný jóninde tıisti tapsyrmalar berildi.
Aıta ketelik Astanada jańa áýejaı qurylysy bes jylǵa sozylýy múmkin.
