Úkimette Pavlodar oblysynyń áleýmettik salasyn damytý máseleleri qaraldy
ASTANA. KAZINFORM — Premer-mınıstrdiń orynbasary — mádenıet jáne aqparat mınıstri Aıda Balaevanyń tóraǵalyǵymen Pavlodar oblysynyń áleýmettik salasyn damytýǵa qatysty máseleler talqylandy, dep habarlaıdy Úkimettiń baspasóz qyzmeti.
Jıynǵa áleýmettik blokqa jetekshilik etetin salalyq mınıstrlikterdiń basshylary men oblys ákimi Asaıyn Baıhanov qatysty.
Óńirde qol jetkizilgen oń nátıjelermen qatar, sheshimin kútetin máseleler de bar ekeni atap ótildi. Atap aıtqanda, densaýlyq saqtaý salasynda medıtsınalyq kadrlardy daıarlaýdy kúsheıtý jáne halyqpen júıeli túsindirý jumystaryn júrgizý qajetine nazar aýdaryldy. Onyń ishinde vaktsınatsııaǵa qatysty medıajospar ázirleý mindeti belgilendi.
Bilim berý salasynda orta bilim sapasyn arttyrýǵa, sondaı-aq bilim berý uıymdary basshylarynyń basqarýshylyq quzyretterin kúsheıtýge basymdyq berildi. Bul rette óńirdiń ınklıýzıvti bilim berýdi damytýdaǵy joǵary kórsetkishterin saqtaý mańyzdy ekeni atap ótildi.
Eńbek jáne halyqty áleýmettik qorǵaý baǵyty boıynsha áleýmettik kelisimshartty iske asyrý, áleýmettik salanyń biryńǵaı tsıfrlyq platformasynyń jumys isteýi jáne kóshi-qon saıasatyna qatysty máseleler qaraldy.
Sondaı-aq buqaralyq sportty damytý, sporttyq ınfraqurylymnyń qoljetimdiligi jáne týrızm máseleleri talqylandy. Baıanaýyl kýrorttyq aımaǵy jyl saıyn eseptik múmkindikterinen asatyn kólemde demalýshylardy qabyldaıtyny aıtyldy.
— Keńes qorytyndysy boıynsha Aıda Balaeva oblys ákimdigine árbir baǵyt boıynsha naqty sharalar qabyldaýdy, qyzmetter sapasyn arttyrýǵa baǵyttalǵan júıeli jumysty kúsheıtýdi, mamandardyń biliktiligin arttyrýdy jáne kadr tapshylyǵyn kezeń-kezeńimen tómendetýdi tapsyrdy, — delingen habarlamada.
Osyǵan deıin Prezıdent tapsyrmalaryn júzege asyrý aıasynda Premer-mınıstr Oljas Bektenovtiń tóraǵalyǵymen Alataý qalasyn damytý jónindegi keńestiń otyrysy ótkenin jazǵan edik.