Úkimette ónerkásip, energetıka jáne kólik salalaryn damytý máseleleri qaraldy
ASTANA.KAZINFORM — Premer-mınıstriniń birinshi orynbasary Nurlybek Nálibaevtyń tóraǵalyǵymen Úkimette ónerkásip jáne qurylys, energetıka jáne kólik mınıstrlikteri basshylarynyń qatysýymen keńester ótti. Bul týraly Úkimettiń baspasóz qyzmeti habarlady.
Kezdesýler barysynda aǵymdaǵy jumystardyń qorytyndylary shyǵarylyp, óńdeý ónerkásibin, jer qoınaýyn paıdalaný salasyn, energetıkalyq keshendi jáne kólik-logıstıkalyq ınfraqurylymdy damytý jónindegi josparlar qaraldy.
Ónerkásip jáne qurylys mınıstrliginiń jelisi boıynsha ınvestıtsııalyq jobalardy júzege asyrýǵa, ınfraqurylymdy jańǵyrtýǵa jáne azamattardy turǵyn úımen qamtamasyz etýge erekshe nazar aýdaryldy. Normatıvtik bazany jetildirý jáne salany basqarýda zamanaýı tásilderdi engizý basym mindetter bolyp qala beredi.
Sondaı-aq munaı-gaz sektoryndaǵy jáne elektr energetıkasyndaǵy ınfraqurylymdy jańǵyrtýǵa jáne jańa generatsııalyq qýattardy iske qosýǵa basa kóńil bólindi. Atap aıtqanda, JEO qurylysy boıynsha jobalardy júzege asyrý barysy jáne otandyq munaı óńdeý zaýyttarynyń turaqty jumysyn qamtamasyz etý jónindegi sharalar qaraldy. Jıynǵa qatysýshylar munaı-gaz hımııasyn damytýmen qatar ishki naryqty gazben jabdyqtaý máselelerin de qarady. Vıtse-premer jylytý maýsymynyń qalypty ótýin erekshe baqylaýda ustaýdy tapsyrdy.
Kólik ınfraqurylymy men logıstıkany damytý máseleleri de egjeı-tegjeıli talqylandy. Atap aıtqanda, avtojol salasynyń, azamattyq avıatsııanyń, temirjol jáne teńiz kóliginiń áleýetin keńeıtý jaıy sóz boldy. Protsesterdi tsıfrlandyrýǵa jáne jobalardy júzege asyrý merzimderin saqtaýǵa erekshe nazar aýdaryldy, bul kólik qyzmetteriniń sapasyn edáýir arttyrýǵa múmkindik beredi.
Premer-mınıstrdiń birinshi orynbasary turaqty ekonomıkalyq ósýdi qamtamasyz etý, otandyq ekonomıkanyń básekege qabilettiligin arttyrý jáne azamattardyń ómir súrý sapasyn jaqsartýǵa baǵyttalǵan naqty nátıjelerge qol jetkizý qajettigine toqtaldy.
Keńester qorytyndysy boıynsha Premer-mınıstrdiń birinshi orynbasary Nurlybek Nálibaev birqatar tapsyrma berdi.
Aıta ketelik Oljas Bektenov jeńil ónerkásipti damytý tásilderin qaıta qaraýdy tapsyrǵan edi.
