Úkimette munaı-gaz jáne kólik salasyn damytý máseleleri qaraldy
ASTANA. KAZINFORM — Premer-mınıstrdiń birinshi orynbasary Nurlybek Nálibaevtyń tóraǵalyǵymen «QazMunaıGaz», «QazaqGaz», «Qazaqstan temir joly», «QazAvtoJol» UK» basshylyǵynyń qatysýymen keńester ótti, dep habarlaıdy Úkimettiń baspasóz qyzmeti.
Keńes barysynda kompanııalardyń aǵymdaǵy qyzmeti jáne aldaǵy kezeńge arnalǵan josparlar týraly esepter tyńdaldy. Qatysýshylar munaı-gaz sektoryn damytý, gaz salasyn damytý, sondaı-aq elimizdiń temirjol jáne avtojol ınfraqurylymyn jańǵyrtý baǵytyndaǵy strategııalyq máselelerdi qarady.
«QazMunaıGaz» UK» AQ qyzmetindegi basym baǵyttar — geologııalyq barlaý jumystaryn ulǵaıtý, resýrstyq bazany tolyqtyrý jáne munaı óndirýdiń turaqty deńgeıin qamtamasyz etý. Qoldanystaǵy ken oryndarynda munaı óndirýdi arttyrý, eksporttyq ınfraqurylymdy damytý jáne munaı jetkizý marshrýttaryn ártaraptandyrý máselelerine erekshe kóńil bólinedi. Sonymen qatar munaı óńdeý zaýyttary qýattaryn jańǵyrtýǵa jáne keńeıtýge, ishki naryqty munaı ónimderimen, onyń ishinde avıaotynmen úzdiksiz qamtamasyz etý jáne munaı-gaz hımııasy salasyn damytý jobalary qaraldy.
QazaqGaz kompanııasy qazir óńirlerdi gazben qamtamasyz etý, magıstraldy gaz qubyrlary men gaz óńdeý zaýyttaryn salý máselelerimen betpe-bet kelip otyr. Keńeste gaz tasymaldaý júıesin jańǵyrtý, tehnologııalyq shyǵyndardy azaıtý, resýrstyq bazany damytý jáne ishki tutynýshylardy gazben senimdi qamtamasyz etý sharalary jeke qaraldy.
«Qazaqstan temir joly» ulttyq kompanııasynyń qyzmeti jyljymaly quramdy jańartý, temirjol vokzaldaryn jańǵyrtý, óndiristik protsesterdi tsıfrlandyrý jáne jolaýshylar men júk jóneltýshilerge kórsetiletin qyzmet sapasyn arttyrý turǵysynan qaraldy.Tranzıttik dálizderdi damytýǵa, nysandardy salý men jańǵyrtý merzimderin saqtaýǵa, memlekettik organdarmen, jergilikti atqarýshy organdarmen jáne merdigerlik uıymdarmen ózara úılestirýdi kúsheıtýge erekshe nazar aýdaryldy.
Óz kezeginde «QazAvtoJol» ulttyq komapnııasynda Memleket basshysynyń avtomobıl joldarynyń ulttyq jelisin damytý jónindegi tapsyrmalaryn oryndaý qorytyndylary usynyldy. Halyqaralyq jáne respýblıkalyq mańyzy bar avtojoldardaǵy iri ınfraqurylymdyq jobalardy júzege asyrý barysy, sondaı-aq jol ınfraqurylymyn kútip ustaý, jóndeý jáne jańǵyrtý máseleleri qaraldy. Qurylys jumystarynyń sapasyna, tranzıttik dálizderdegi «tar tustardy» joıýǵa jáne jol qozǵalysy qaýipsizdigin arttyrýǵa erekshe nazar aýdaryldy.
Talqylaý barysynda Premer-mınıstrdiń birinshi orynbasary strategııalyq jobalardy ýaqtyly iske qosý, óndiristik ınfraqurylymnyń turaqty jumysyn qamtamasyz etý, sondaı-aq ınvestıtsııalyq qyzmettiń tıimdiligin arttyrýdyǵ mańyzdylyǵyn atap ótti.
— Nurlybek Nálibaev munaı-gaz keshenin ozyq qarqynmen damytý, gazben qamtý deńgeıin arttyrý, energetıkalyq qaýipsizdik pen ishki naryq turaqtylyǵyn qamtamasyz etý, jobalardyń sapaly ári ýaqtyly oryndalýy, tasymaldaý úderisiniń tıimdiligin arttyrý, qozǵalys qaýipsizdigin nyǵaıtý jáne eldiń kóliktik-logıstıkalyq áleýetin damytýǵa baǵyttalǵan naqty nátıjelerge qol jetkizýdiń mańyzdylyǵyna toqtaldy, — delingen habarlamada.
Keńes qorytyndysy boıynsha josparly kórsetkishterdiń oryndalýyn qamtamasyz etýge, jobalardy júzege asyrýdy jedeldetýge, salaǵa qatysýshylar arasynda úılestirýdi kúsheıtýge jáne munaı-gaz, kólik sektorlaryn odan ári damytý jóninde usynystar daıyndaýǵa baǵyttalǵan tıisti tapsyrmalar berildi.
Osydan buryn Nurlybek Nálibaev Qaraǵandy oblysynyń negizgi jobalarymen tanysqanyn jazǵanbyz.
