Úkimet metallýrgııa keshenin damytý úshin qandaı sharalardy qolǵa almaq
ASTANA. KAZINFORM - Úkimette ótkizilgen ekonomıkalyq ósýdi qamtamasyz etý jónindegi shtab otyrysynda vıtse-premer – ulttyq ekonomıka mınıstri Serik Jumanǵarın Ónerkásip jáne qurylys mınıstrligi men óńirlerdiń aldyna taý-ken metallýrgııa kesheniniń 2025 jylǵy naqty kólem ındeksin (NKI) ulǵaıtý mindetin qoıdy.
Ónerkásip jáne qurylys mınıstrligi 2025 jyly fızıkalyq metallýrgııa ındeksiniń 5%, metall keniniń 3,1%, kómir óndirýdiń ótken jyldyń deńgeıinde ósýin boljaıdy. Mys, altyn, prokat, ferroqorytpa, shoıyn óndirý kóleminiń ulǵaıýy esebinen metallýrgııa kólemin arttyrý josparlanýda. Sondaı-aq bıyl «Qaragandy Power Silicon» JShS keshendi qorytpa zaýyty, «Ekibastuz FerroAlloys» JShS ferroqorytpa óndirisi, «Shagala mining» JShS katodty mysy, Lımannoe ken orny iske qosylady.
Vıtse-premer shtab otyrysynda atap ótkendeı, bıyl elimizdiń ekonomıkalyq ósiminiń 7%-dyq targetteletin kórsetkishi úshin TMK-nyń josparlanyp otyrǵan ósý kórsetkishteri jetkiliksiz.
«Elimizdiń ekonomıkalyq ósýi boıynsha 7% maqsatty baǵyt sheńberinde óńdeýshi ónerkásip ósiminiń nysanaly ındıkatory 7,6%-dy quraıdy. Óńdeýshi ónerkásiptegi úles salmaǵy shamamen 40%-dy quraıtyn metallýrgııa boıynsha negizgi ónim túrleri boıynsha NKI-niń josparlanǵan kórsetkishteri negizinde biz 2-3%-dan aspaıtyn ósimdi kóremiz. Bıyl barlyq salalyq óndirýshilerimen birlesip, TMK-da joǵary ósimge qalaı qol jetkizýge bolatynyn talqylaý qajet, kórsetkishterdi barynsha táýekeldi túrde qoıý kerek», — dep atap ótti vıtse-premer.
Sondaı-aq otyrysta Atyraý jáne Batys Qazaqstan oblystaryndaǵy ınvestıtsııalyq jobalardyń iske asyrylý barysy tyńdaldy.
BQO-da 2025 jylǵy qańtarda negizgi kapıtalǵa ınvestıtsııa 28,9 mlrd teńgeni qurady. Bul ótken jylǵy qańtar aıymen salystyrǵanda 7,1%-ǵa artyq (26,7 mlrd teńge). Onyń ishinde 90,2%-y jeke ınvestıtsııa, 9,8%-y bıýdjettik ınvestıtsııa. 2025 jylǵa arnalǵan negizgi kapıtalǵa ınvestıtsııalar boıynsha oblystyń KPI-y 841 mlrd teńge. 2024 jylǵy 9 aıda tikeleı sheteldik ınvestıtsııa aǵyny $995,5 mln-dy qurady. Bul 2023 jylǵy sáıkes kezeńdegi kórsetkishten 13,1%-ǵa artyq ($880,1 mln). TShI-degi negizgi úles taý-ken ónerkásibine tıesili. 2025 jyly jalpy quny 44,5 mlrd teńge bolatyn 769 jumys orny ashylatyn 25 ınvestıtsııalyq jobany iske asyrý josparlanǵan.
Atyraý oblysynda ınvestıtsııanyń negizgi úlesi taý-ken ónerkásibine tıesili. 2025 jylǵy qańtarda ınvestıtsııa kólemi 100,9 mlrd teńgeni qurady. Bul 2024 jylǵy qańtardyń kórsetkishiniń jartysynan tómen (195,4 mlrd teńge). 2025 jyly jalpy quny 59 mlrd teńgeni quraıtyn, 595 jumys orny ashylatyn, 15 ınvestıtsııalyq joba paıdalanýǵa beriledi. Olardyń qatarynda «ATYRAU CHICKEN» JShS qus fabrıkasy, «Aıdana-Agro» ShQ jylyjaı kesheni, «Teksol-Trans» JShS suıytylǵan gazdy saqtaýǵa arnalǵan qoıma, «Jumaǵalıeva» ShQ kókónis qoımasy jáne basqalary bar.
Qazirgi ýaqytta, óńirlerdiń derekteri boıynsha, ınvestıtsııalyq jobalardy iske asyrý úshin eleýli kedergiler baıqalmaıdy. Osyǵan qaramastan, vıtse-premer óńirlerdi «Báıterek» holdıngi arqyly qoljetimdi qarjylandyrýǵa ótinim berý úderisine bıznesti belsendi tartýǵa shaqyrdy.
Osyǵan deıin Úkimette Sátbaev kanalynan Astanaǵa deıin sý qubyryn salý jobasy talqylanǵany týraly jazdyq.