Úkimette qurylys kórsetkishteri artqan óńirler ataldy
ASTANA. KAZINFORM – Jyl basynan qurylys jumystarynyń kólemi 14,8%-ǵa ósti. Bul týraly Úkimet otyrysynda 3 aıdyń áleýmettik-ekonomıkalyq damý qorytyndysyn talqylaý kezinde Ulttyq ekonomıka birinshi vıtse-mınıstri Azamat Ámrın málim etti.
- Turaqty damýdy qamtamasyz etý úshin ekonomıkany odan ári ártaraptandyrýǵa basa nazar aýdarýdy jalǵastyrý mańyzdy, bul ortasha tabys tuzaǵynan shyǵýǵa múmkindik beredi. Óńdeý ónerkásibindegi ósý mashına jasaý óndirisiniń 21,9%-ǵa, onyń ishinde avtomobıl qurastyrýdyń – 29,6%-ǵa jáne elektr jabdyqtaryn óndirýdiń 31,3%-ǵa ósýi esebinen qamtamasyz etildi. Tamaq ónimderin óndirý – 12,6%-ǵa, sýsyndardy óndirý – 10%-ǵa, qurylys materıaldary óndirisi – 37,1%-ǵa, metall buıymdary – 39,3%-ǵa, farmatsevtıkalyq ónimder – 46%-ǵa, hımııa ónerkásibi – 2,4%-ǵa ulǵaıdy. Bul rette metallýrgııadaǵy óndiris 6,3%-ǵa tómendedi, - dedi A. Ámrın.
Sonymen qatar ol osy jyly ekonomıkanyń ósýi munaı sektorynyń oń úlesisiz qamtamasyz etiletinin atap ótti. Bıylǵy qańtar-naýryzda munaı óndirýdiń 19,8%-ǵa jáne tabıǵı gaz óndirýdiń 15,1%-ǵa qysqarýy esebinen taý-ken ónerkásibindegi óndiris kólemi 11,4%-ǵa tómendedi.
- Osy jyly munaı óndirýdiń jalpy ishki ónimge salymy baǵalaý boıynsha mınýs 0,3 paıyzdyq tarmaqty quraıdy. Sonymen birge kómir óndirý – 12,8%-ǵa, metall kenderin óndirý – 0,6%-ǵa jáne ózge de paıdaly qazbalardy óndirý 39,4%-ǵa artty. Qurylys jumystarynyń kólemi 14,8%-ǵa ósti. Ósý 16 óńirde tirkeldi, bul rette eń joǵary kórsetkish Ulytaý, Jambyl, Pavlodar, Mańǵystaý oblystarynda jáne Shymkent qalasynda baıqaldy. Qurylys jumystary kóleminiń tómendeýi Aqmola, Jetisý, Abaı oblystarynda baıqaldy. 3,9 mln sharshy metr turǵyn úı paıdalanýǵa berildi, bul ótken jyldyń sáıkes kezeńinen 3,8%-ǵa artyq. Eń joǵary kórsetkishter Abaı, Qaraǵandy, Túrkistan, Ulytaý oblystarynda jáne Shymkent qalasynda baıqaldy, - dedi vıtse-mınıstr.
Budan buryn habarlanǵandaı, kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti.