Úkimette kómir hımııa zaýytyn salý máselesi talqylandy

ASTANA. KAZINFORM — Oljas Bektenov Shandong Energy Group Co. basshysy Lı Veımen 1,5 myń jumys ornyn ashýǵa múmkindik beretin kómir hımııa zaýytyn salý máselesin talqylady. Bul týraly Úkimettiń baspasóz qyzmeti habarlady. 

Premer-mınıstr Oljas Bektenov Shandong Energy Group Co. basqarma tóraǵasy Lı Veımen kezdesý ótkizdi. Onda energetıka salasyndaǵy yntymaqtastyq, onyń ishinde Qazaqstanda kómir hımııa zaýytyn salý boıynsha birlesken jobany júzege asyrý máseleleri talqylandy.

QazaqGaz jáne Shandong Energy Group Co. kompanııalarynyń Qaraǵandy oblysyndaǵy kómirden gaz óndiretin kómir hımııa zaýytynyń qurylysy boıynsha birlesken josparlaryna nazar aýdaryldy. Jobalyq qýaty jylyna 2 mlrd m3 gaz. Óndiristi iske qosý Qazaqstannyń kómir-hımııa salasynyń damýyna jańa serpin beredi. Gazdyń qosymsha kólemi, 1,5 myń turaqty jumys ornyn ashý, ekonomıkany ártaraptandyrý, jańa tehnologııalardy damytý, sondaı-aq elimizdiń eksporttyq áleýetin kúsheıtedi dep kútilýde.

Premer-mınıstr Oljas Bektenov Qazaqstan Úkimeti Qytaı Halyq Respýblıkasymen ekonomıkanyń túrli salalarynda, onyń ishinde kómir hımııasy salasynda ózara tıimdi yntymaqtastyqty damytýǵa basa mán beretine toqtaldy.

Shandong Energy Group Co. basqarma tóraǵasy Lı Veı Qazaqstanmen yntymaqtastyqty damytýǵa jáne ónerkásiptiń keleshegi zor baǵytyna ınvestıtsııa salýǵa múddeli ekenin aıtty.

Kelissózder qorytyndysy boıynsha taraptar birlesken jospardy júzege asyrý úshin syndarly dıalogqa nıetti ekenin jetkizdi.

Anyqtama: Shandong Energy Group Co. (SEG) – Qytaıdyń energetıka, kómir jáne kómir hımııasy salasynda kóp jyldyq tájirıbesi bar júıe quraýshy kásiporyn. Innovatsııalyq tásil arqyly kompanııa QHR-da kómirtegi, metanol jáne kómir negizinde óndiriletin basqa da hımııalyq ónimderdi óndirýde kóshbasshy boldy. SEG-tiń QHR provıntsııalarynda jáne 17 elde ornalasqan 608 enshiles kásiporny bar. 

Aıta ketelik Qazaqstan men Qytaı 25 mlrd dollarǵa 60 kelisimge qol qoıdy.