Úkimette kóleńkeli lobbı bar — Depýtat lýdomanııa týraly zań jobasynyń keshigip jatqanyna narazy

ASTANA. KAZINFORM — Májilis depýtaty Elnur Beısenbaev Úkimettiń lýdomanııa týraly zań jobasyn 1,5 jyl boıy ustap otyrǵanyn aıtyp, Sybaılas jemqorlyqqa qarsy is-qımyl agenttiginiń osy iske aralasýyn surady.

«Keıbir resmı de beıresmı de málimet boıynsha, qumar oıyndarynyń naryǵynda 1 trln teńgeden astam aqsha aınalyp júr. Atalǵan zań jobasy (Lýdomanııa týraly — red) áli Úkimette jatyr. Májilis ony sizderge qorytyndy jasaýǵa usynǵanbyz. Biz bári zań negizinde jumys istegenin qalaımyz. Biraq Úkimettiń osy zań jobasyn ustap otyrǵanyna 1,5 jyl boldy. Osy jerde meniń Úkimet tarapyna naqty kúdigim bar. Bálkim qatelesetin shyǵarmyn, biraq sybaılas jemqorlyqqa qarsy qyzmetke usynysym bar. Úkimet nege ol zań jobasyn ustap otyr? 1,5 jyl boldy. Ol jerde jemqorlyq táýekeli bar degen kúdik týyndaıdy. Adamdardyń qandaı da bir múddesi bolýy múmkin. Búkil býkmekerlik keńseler, lotereıa bıznesimen aınalysatyn kóp adam kóleńkeli kezdesýlerde ol zań jobasyn sizderge ótkizdirmeımiz dep aıtatyn kórinedi. Bar kúshimizben jibermeı qalamyz deıdi. Qandaı kúshpen deısizder? Olardyń úlken aqsha usynǵysy keletini aıqyn», — dedi depýtat. 

Sondaı-aq, ol atalǵan máseleni jańadan taǵaıyndalǵan Premer-Mınıstrdiń aldyna qoıatynyn aıtty.

«Osy jumys jóninde úlken kúdigim bar. Jemqorlyq qaıda jasyrynyp jatyr deımiz? Mine, osyndaı úlken, qoǵamǵa óte qajet zań jobasyn kidirtip otyr. Iá, biz qumar oıyndaryn oınaýǵa haqyly adamdardyń jasyn 25-ke deıin etip shektegimiz keledi. Másele nede? Prezıdent tapsyrma beredi, Amanat fraktsııasynda talqylaımyz. Al zań jobasy toqtap tur. Ortaq paıymǵa kele almaı otyrsyzdar. Kele almaı otyrsańyzdar jaqsy ǵoı. Men 100 paıyz ol jerde úlken kóleńkeli múdde bar dep esepteımin. Jańa Premer-Mınıstrdiń aldynda osy tapsyrmany mindetti túrde qoıamyz. Aldymyzda Úkimet ókilderi otyr. Ótinish, osy jumysty qolǵa alyńyzdar», — dedi Elnur Beısenbaev.